Совети за животот и исхраната
Здрава исхрана и ресторани за здрава храна
Од небесниот Дародавец
- Од извештаите за Господовите чуда кога обезбеди вино за учесниците на свадбената свеченост и кога го нахрани мноштвото, можеме да извлечеме поука од најголемо значење. Работата на снабдување со здрава храна е едно од Господовите средства за задоволување на потребите. Небесниот Дарител на секоја храна нема да го остави Својот народ во незнаење во поглед на подготвувањето на најдобрата храна за секое време и пригода. — (1902) 7. Сведоштво 114 {СЖИ 267.1}
Да биде како маната
- Во текот на минатата ноќ многу вистини ми беа откриени. Производството и продажбата на здрава храна ќе побарува внимателно размислување пропратено со молитва. {СЖИ 267.2}
Постојат многу умови на многу места на кои Бог сигурно ќе им даде мудрост во работата за подготвувањето на здрава и вкусна храна, доколку види дека тие правилно ќе го искористат тоа знаење. Животните стануваат се повеќе и повеќе болни, и нема долго да потрае кога многумина, покрај адвентистите на седмиот ден, ќе ја напуштат месната храна. Здравата храна којашто го одржува животот треба така да се приготви така што мажите и жените нема да имаат потреба да јадат месо. {СЖИ 267.3}
Господ ќе поучи мнозина во сите делови на светот како да комбинираат овошје, житарки и зеленчук во храна којашто ќе го одржува животот, и нема да донесува болест. Оние коишто никогаш не виделе рецепти за подготвување на здрава храна, којашто сега е во продажба, ќе работат разумно, вршејќи обиди со прехранбените производи од земјата, добивајќи светлина во поглед на користењето на овие производи. Господ ќе им покаже што да чинат. {СЖИ 267.4}
Оној којшто дава вештина и разбирање на својот народ во еден дел на светот, ќе даде вештина и разбирање на Својот народ и во другите делови од светот. Неговиот план е прехранбените богатства на една земја да бидат така подготвени како би можеле да се користат, доколку одговараат, и во другите земји. Како што Бог дал мана од небото за да го одржи животот на децата израелски, така Тој ќе му даде сега на Својот народ во разни краеви, вештина и мудрост да ги употребат производите коишто кај нив постојат за подготвување на храна којашто ќе го замени месото. — (1902) 7. Сведоштво 124, 126 {СЖИ 267.5}
- Истиот Бог кој на Израилевите деца им давал мана од небото, живее и владее денес. Тој ќе им даде вештина и разбирање во подготвувањето на здрава храна. Тој ќе го води Својот народ во подготвувањето на здрава храна. Тој посакува да ги оспособи да видат што можат да сторат за да подготвуваат таква храна не само за своите семејства, што е нивната прва должност, туку да им помогнат и на сиромашните. Тие треба да покажат Христова широкоградост, разбирајќи дека го претставуваат Бога и дека сето она што го поседуваат е Негов дар. — Letter 25, 1902 {СЖИ 268.1}
Знаењето дадено од Бога
- Господ би сакал народот да добие знаење за здравствената реформа. Тоа е главен дел од образованието кое треба да се пружи во нашите училишта. Заради тоа што вистината се изнесува во нови места, потребно е да се даваат поуки за доброто и правилното готвење. Поучете ги луѓето како да живеат без употреба на месна храна. Поучете ги луѓето на едноставноста на живеењето. {СЖИ 268.2}
Господ работел и сѐ уште работи овозможувајќи им на луѓето да подготвуваат таква храна од овошје и житарки, којашто ќе биде поедноставна и поевтина од многуте храни коишто сега можат да се добијат. Многумина не можат да дојдат до скапата подготвена храна, но сепак немаат потреба да живеат на слаба исхрана. Истиот Бог којшто со леб од небото нахрани илјадници во пустината, ќе му даде на денешниот народ умешност да приготвува храна на едноставен начин. — (1905) Manuscript 96 {СЖИ 268.3}
- Кога веста ќе допре до оние коишто не слушнале за вистината за ова време, тие ќе согледаат дека во нивната исхрана треба да дојде до голема реформа. Тие ќе сфатат дека треба да ја отфрлат месната исхрана, затоа што таа создава желба за жестоки пијалаци и го прави телото подложно на болести. Употребата на месото ги слабее телесните, умствените и моралните сили. Човекот е составен од она што го јаде. Нескротените страсти владеат заради употребата на месото, тутунот и алкохолните пијалаци. Господ ќе му даде мудрост на својот народ да приготви, од она што земјата го дава, храна којашто ќе ја замени месото. Едноставна комбинација на зрнести плодови, житарки и овошје, приготвени вкусно и вешто, ќе бидат самите препорачливи до неверниците. Меѓутоа, во некои комбинации, се употребува премногу од зрнестите плодови. — (1901) Manuscript 156 {СЖИ 268.4}
Едноставно, лесно приготвена – здраво
- Јас сега мора да им дадам на своите браќа и сестри упатство кое Бог ми го даде во поглед на прашањето за здрава храна. Многумина здравата храна ја сметаат за човечки изум, меѓутоа таа потекнува од Бога како благослов за Неговиот народ. Делото на производството на здравата храна е Божја сопственост и од него не треба да се направи финансиска шпекулација заради лична добивка. Светлината којашто Бог ја дал и која ќе продолжи да ја дава за прашањето за исхраната треба да му биде на Неговиот сегашен народ она што маната била за децата Израелови. Маната паѓала од небото и на народот му било кажано да ја собира и подготви за јадење. Така исто и во различни делови на светот, Божјиот народ ќе добие светлина и ќе подготвува здрава храна која одговара за тие земји. {СЖИ 269.1}
Верниците на секоја црква треба да негуваат тактичност и разумност која ќе им биде дадена од Бога. Господ може да даде тактичност и разбирање на сите оние коишто сакаат да ја користат таа способност во стремежот да научат како да ги комбинираат производите од земјата како би направиле едноставни, лесно приготвени и здрави јадења коишто ќе го заземат местото на месото, така што никој нема да има изговор за јадење на истото. {СЖИ 269.2}
Оние коишто добиле знаење за подготовка на таква храна, треба несебично да го користат. Тие треба да им помогнат на своите сиромашни браќа и сестри. Тие треба да бидат производители а исто така и потрошувачи. {СЖИ 269.3}
Божјата цел е здравата храна да се произведува на многу места. Оние коишто ќе ја примат вистината треба да научат како да ја подготвуваат оваа едноставна храна. Божјиот план не е сиромашните да патат заради недостатокот на животните потреби. Бог ги повикува своите следбеници во разни земји од Него да бараат, и правилно да ја употребуваат таа мудрост којашто Тој им ја дава. Ние не треба да застанеме во безнадежноста и обесхрабрувањето. Ние треба да направиме сѐ што можеме како би ги просветлиле другите. — (1902) Manuscript 78 {СЖИ 269.4}
Поедноставно и поевтино
- Во многу што треба да се подобри квалитетот на здравата храна која излегува од нашите фабрики. Господ ќе ги поучи своите слуги како да подготвуваат храна која ќе биде поедноставна и поевтина. Постојат многумина коишто Тој сака да ги поучи во оваа област, доколку сакаат да живеат според Неговите совети и во согласност со своите браќа. — (1902) 7. Сведоштво 127, 128 {СЖИ 270.1}
- Работете со храната којашто е многу поевтина и која, подготвена на здрав начин, ќе одговара на секоја намена … Трудете се да произведувате евтини производи од житарки и овошје. Сето тоа нам Бог доброволно ни го дал да ги задоволи нашите потреби. Здравјето не се зачувува со употребата на скапо подготвените јадења. Ние можеме исто така да имаме добро здравје и кога употребуваме едноставно подготвени јадења од овошје, житарки и зеленчук. — (1906) Manuscript 75 {СЖИ 270.2}
- Наша мудрост е да приготвуваме едноставни, евтини и здрави јадења. Многумина меѓу нас се сиромашни и затоа треба да се обезбеди здрава храна која може да се набави по цена која сиромашните ќе можат да ја платат. Божјиот план е најсиромашните луѓе во секој дел од светот да се снабдуваат со евтина и здрава храна. Во многу места треба да се основаат фабрики за производство на ваква храна. Она што е благослов за Делото во едно место, ќе биде благослов и во друго место во коешто е многу потешко да се заработат пари. {СЖИ 270.3}
Бог работи во полза на Својот народ. Тој не посакува тие да бидат без средства. Тој го враќа кон исхраната која првобитно му била дадена на човекот. Неговата исхрана треба да се состои од храна којашто е составена од намирници коишто Тој ги дал. Материјалот кој воглавном се употребува за оваа храна, треба да биде овошје, житарки и зрнести плодови, меѓутоа можат да се употребат разни корења исто така. — (1902) 7. Сведоштво 125, 126 {СЖИ 270.4}
Заради тоа што гладот се зголемува, храната мора да се поедностави
- Прашањето на здравствената реформа сѐ уште не е решено. Уште многу што треба да се научи во оваа гранка. Господ посакува во целиот свет умот на Неговиот народ да биде во таква состојба како би можел да ги прими сите Негови совети за комбинирање на одредени намирници во производството на храна, којашто ќе биде неопходна, и коишто сѐ уште не се произведуваат. {СЖИ 271.1}
Заради тоа што гладот во целиот свет, потребата и неволјата сѐ повеќе и повеќе ќе се зголемуваат, производството на здрава храна во голема мерка ќе мора да се поедностави. Оние коишто се вработени во ова дело треба постојано да учат од Големиот Учител, којшто го сака својот народ и којшто нивното добро го има постојано пред Своите очи. — (1901) Manuscript 14 {СЖИ 271.2}
[Здравата храна замена за месото, млекото и путерот – 583]
Христовите поуки за штедењето
- Во ова дело има многу од она што треба да се реши. Со здравите производи на земјата треба да се вршат опити со цел да се направи здрава и евтина храна. {СЖИ 271.3}
Бизнисот со храната треба да стане предмет на сериозна молитва. Нека луѓето замолат од Бога мудрост за подготвување на здрава храна. Оној којшто ги нахранил петте илјади со пет лебови и две мали риби, ќе ги задоволи и денес потребите на Неговите деца. Откако го стори ова прекрасно чудо, Христос даде поука за штедењето. Кога мноштвото ја задоволи својата глад, Тој рече: „Соберете ги остатоците кои преостанаа за да ништо не пропадне”. „И тие ги собраа остатоците кои преостанаа, дванаесет полни кошници”. — Letter 27, 1902 {СЖИ 271.4}
Храна од домашни продукти во различни земји
- На многумина во разни места Бог ќе им даде мудрост да подготвуваат здрава храна. Тој може да постави трпеза во пустината. Здравата храна треба да ја подготвуваат и нашите цркви кои се трудат да ги спроведуваат во дело начелата на здравствената реформа. Меѓутоа штом тоа ќе го сторат некои ќе речат дека црквата посегнува по нивните права. Меѓутоа кој им дал мудрост да ги подготвуваат тие јадења? – Небесниот Бог. Тој ист Бог ќе му даде и мудрост на Својот народ во разни земји да ги користат производите на тие земји за подготвување на здрава храна. На едноставен, и евтин начин, Божјиот народ треба да прави опити со овошјето, житарките и корењето во земјите во кои живее. Во разни земји треба да се произведува евтина, здрава храна за доброто на сиромашните и за доброто на семејствата на Божјиот народ. {СЖИ 271.5}
Веста којашто Бог ми ја дал кажува дека Неговиот народ во странските земји не треба да биде зависен во своето снабдување на здрава храна со увоз од Америка. Транспортот и царината прават цената на оваа храна да стане толку висока така што сиромашните коишто се во Божјите очи исто така драгоцени како и богатите, не можат да имаат од неа никаква полза. {СЖИ 272.1}
Здравата храна е Божји производ и Тој ќе стори да Својот народ во мисионерските полиња, така да ги комбинира производите на земјата како би се обезбедила едноставна, евтина и здрава храна. Доколку бараат мудрост од Бога, Тој ќе ги учи како да планираат и пронајдат најдобар начин за користење на овие производи. Добив налог да кажам: „Немојте да им забранувате”. — (1902) Manuscript 40 {СЖИ 272.2}
Здравата храна треба да овозможи развој и напредок на здравствената реформа
- Во полето, во кое работиш, има многу што да се научи во поглед на подготвувањето на здрава храна. Треба да се подготви совршено здрава, а сепак евтина храна. На сиромашните треба да им се проповеда евангелието на здравјето. Во производството на оваа храна ќе се отворат патишта за да оние коишто ќе ја прифатат вистината и ќе ја изгубат својата работа, можат да заработат за својот живот. Производите коишто Бог ги дава треба да се претворат во здрава храна којашто луѓето можат сами да ја подготват. Тогаш можеме успешно да го изнесуваме начелата на здравствената реформа и оние коишто ќе слушнат ќе бидат убедени во доследноста на овие начела и ќе ги прифатат. Меѓутоа се дотогаш додека не можеме да претставиме храна којашто е вкусна, хранлива и која е во хармонија со здравствената реформа, а сепак евтина, ние немаме право да ги изнесуваме најнапредните фази на здравствената реформа во исхраната. — Letter 73а, 1896 {СЖИ 272.3}
[Поттикнување на развој на индивидуални таленти – 376]
- Каде и да се проповеда вистината, треба да се даваат упатства за подготвување на здрава храна. Бог посакува во секое место луѓето да се подучуваат на мудрото користење на производите коишто можат да се добијат. Вешти учители треба да му покажат на народот како најдобро да ги користат производите коишто можат да се одгледуваат или прибават во тој дел од земјата. На тој начин сиромашните, како и оние коишто живеат под подобри услови, можат да научат како да живеат здрав начин на живот. — (1902) 7. Сведоштво 132 {СЖИ 273.1}
Зрнестите плодови треба умерено да се користат
- Господ би сакал да луѓето во сите делови на светот мудро ги користат производите од земјата на секое место. Производите од секој крај треба да се проучуваат и грижливо да се испитуваат како би се видело дали можат да се употребат така за да се поедностави производството на храна и намалат нејзините трошоци и трошоците за превозот. Нека сторат најдобро од себе што можат, правејќи го тоа како под Божји надзор. Постојат многу скапи намирници кои човечкиот гениј може да ги комбинира; па сепак не постојат секогаш вистински потреби да се применат најскапите начини на подготвување. {СЖИ 273.2}
Пред три години, добив писмо кое гласеше: „Не можат да јадам храна со зрнести плодови; мојот желудник тоа не може да го свари”. Тогаш ми беа покажани неколку рецепти. Еден од нив налагаше дека треба да постојат и други состојки комбинирани со зрнести плодови, кои би се сложиле со нив, намалувајќи ја нивната пропорција. Една десетина до една шестина на зрнести плодови би било доволно, според комбинацијата. Ние тоа со успех го испробавме. {СЖИ 273.3}
[Види „Зрнести плодови и храна од нив” во одделот XXII]
Сладок кекс
Други нешта беа споменати. Стана збор за слаткиот кекс или бисквитот. Тие се произведуваат затоа што некој ги сака, и тогаш тие можат да дојдат до оние кои не треба да ги јадат. Сеуште треба да се извршат некои подобрувања и Бог ќе работи со сите кои сакаат да работат со Него. — Letter 188, 1901 {СЖИ 274.1}
[Види Сладок леб, колачи, кекс – 507, 508]
[Некои таканаречени „здрави слатки” се штетни – 530]
- Оние коишто подготвуваат рецепти за нашите здравствени списанија треба да посветат големо внимание. Посебно подготвената храна, којашто сега се прави, може да се подобри и нашите планови за нејзина употреба треба да се изменат. Некои неограничено употребувале зрнести плодови во подготвувањето на храната. Многумина ми имаат пишано: „Јас не можам да употребувам храна од зрнести плодови; што да употребувам наместо месото?” Една ноќ ми се чинеше како да стојам пред една група на луѓе, зборувајќи им за тоа дека премногу ги употребуваат зрнести плодови во приготвувањето на храната; дека организмот не може да ги свари кога се користат како во некои рецепти коишто се дадени, и доколку се употребуваат многу поумерено, резултатите ќе бидат многу подобри. — (1902) 7. Сведоштво 126 {СЖИ 274.2}
Службата на рестораните за здрава храна на нашите состаноци под шаторите
- На нашите камп собори треба да се извршат подготовки како сиромашните би можеле да добијат што поевтина, здрава, добро подготвена храна. Исто така треба да постои ресторан во којшто ќе се подготвуваат и служат здрави и примамливи јадења. Тоа воспитно ќе влијае врз оние коишто не се од нашата вера. Нека на оваа гранка од делото не се гледа како на нешто одвоено од останатите гранки на делото на состаноците под шаторите. Секоја гранка на Божјото дело тесно е поврзана со секоја друга и сите тие треба да напредуваат во совршена хармонија. — (1902) 7. Сведоштво 126 {СЖИ 274.3}
- Во нашите градови, заинтересирани работници ќе се прифатат за разни гранки од мисионерската работа. Ресторани за здрава храна ќе бидат основани. Меѓутоа, со колкаво внимание мора да се изврши оваа работа! Оние коишто работат во овие ресторани треба да вршат опити како би можеле да научат да подготвуваат вкусна и здрава храна. Секој хигиенски ресторан треба да биде училиште за работниците кои се поврзани со него. Во градовите оваа гранка на делото може да се развие на многу поширока основа отколку во помалите места. Меѓутоа, во секое место во кое се наоѓа црква и црквено училиште, треба да се даваат поуки за подготвувањето на едноставна, здрава храна коишто ќе ги користат оние што сакаат да живеат во согласност со начелата на здравствената реформа. Во сите наши мисионски полиња може да се изврши слична работа. — Manuscript 79, 1900 {СЖИ 274.4}
Нашите ресторани треба да се залагаат за начелата
- Ќе биде потребно постојано да се чувате од воведување на новини, кои наизглед не се штетни, но сепак, водат кон жртвување на начелата, што никогаш не смее да се подржи во нашата работа со рестораните … Ние не можеме да очекуваме дека оние коишто целиот свој живот му попуштале на апетитот, веднаш да разберат како да подготвуваат храна којашто ќе биде здрава, едноставна и вкусна. Тоа е наука којашто секој санаториум и здравствен ресторан треба да ја проучува… {СЖИ 275.1}
Доколку во нашите ресторани се намали бројот на потрошувачите затоа што одбиваме да се оддалечиме од вистинските начела, нека и се намали. Ние мораме да се држиме до патот Господов и во добро и во зло… {СЖИ 275.2}
Јас ви го изнесувам ова во своите писма за да ви помогнам да се приврзете до она што е правилно и да го отфрлите она што не можеме да го внесеме во нашите санаториуми и ресторани, без да ги жртвуваме начелата. — Letter 201, 1902 {СЖИ 275.3}
Одбегнувајте сложени состави
- Во сите ресторани во нашите градови, постои опасност со комбинацијата на многу јадења коишто се служат, да се отиде многу далеку. Желудникот страда кога толку многу различни видови на храна се земат за време на еден оброк. Едноставноста е дел од здравствената реформа. Постои опасност нашето дело да престане да го заслужува името кое го носи. {СЖИ 275.4}
Доколку работиме на обновувањето на здравјето, потребно е да го скротиме апетитот, да јадеме полека и да ја ограничиме разноликоста на храната за еден оброк. Ова упатство треба често да се повторува. Не е во согласност со начелата на здравствената реформа за еден оброк да се употребат толку многу различни јадења. Ние не смееме никогаш да заборавиме дека тоа е верски дел од делото, дело на снабдување на душата со храна, што е многу понеопходно од што и да е друго. — Letter 73а, 1896 {СЖИ 275.5}
Задачата на рестораните засновани врз здравствената реформа
- Ми беше покажано дека не треба да бидеме задоволни со тоа што има вегетаријански ресторан во Бруклин, туку дека треба да бидат основани и други во останатите делови на градот. Луѓето коишто живеат во еден дел на Њујорк не знаат што се случува во другите делови на овој голем град. Мажите и жените коишто се хранат во рестораните, коишто се отворени на различни места, ќе почувствуваат подобрување на здравјето. Кога еднаш ќе се придобие нивната доверба, тие ќе бидат поподготвени да ја прифатат Божјата посебна вест на вистината. {СЖИ 276.1}
Каде и да во големите градови се спроведува здравствено-мисионерско дело, треба да се одржуваат и училишта за готвење; а таму каде што напредува воспитно-мисионерското дело, треба да се основаат ресторани за здрава храна, што ќе даде практична слика на правилниот избор и подготвување на здрава храна. — (1902) 7. Сведоштво 55 {СЖИ 276.2}
- Господ има вест за нашите градови и оваа вест треба да ја објавиме на нашите состаноци под шатори, како и преку нашите публикации. Освен тоа, во градовите треба да се основаат ресторани за здрава храна како би можело преку нив да се објави веста за умереноста. Треба да се подготви одржување на состаноците во поврзаност со нашите ресторани. Кога и да е тоа можно, нека една просторија биде обезбедена како потрошувачите би можеле да се повикуваат на часови за здравјето и христијанска умереност, на кои ќе можат да се даваат упатства за подготвувањето на здрава храна и други важни предмети. На овие состаноци треба да има молитва, песни и предавања не само за предметите на здравјето и умереноста, туку и за другите соодветни библиски теми. Кога луѓето ќе се поучат како да го запазат телесното здравје, ќе се најдат многу можности за сеење на радосната вистина за небесното царство. — (1902) 7. Сведоштво 115 {СЖИ 276.3}
Конечна цел на делото на здравата исхрана
418. Делото на здравата исхрана може корисно да се употреби кога се води така што вниманието на луѓето се управува кон Христовото евангелие. Меѓутоа, јас го подигам својот глас на предупредување против напорите кои не постигнуваат ништо повеќе од производство на храна за задоволување на телесните потреби. Сериозна грешка е да се употреби толку време и толку многу човечки способности за подготвување на храна, додека истовремено не се чини никаков посебен напор на мноштвото да му се даде лебот на животот. Големи опасности го демнат делото кое нема за цел откривање на патот на вечниот живот. — (1906) Manuscript 10 {СЖИ 277.1}
