Совети за животот и исхраната
Месна храна
Месната исхрана – последица од гревот
- Бог на нашите прародители им ја дал храната која ја определи дека треба да ја јаде целиот човечки род. Одземањето на животот на било кое суштество е спротивно на Неговиот план. Во Едем не требало да има смрт. Овошките од дрвјата во градината биле храната што ја барале потребите на човекот. Бог не му дал на човекот дозвола да јаде животинска храна сѐ до после потопот. Бидејќи било уништено сѐ од што човекот можел да се одржува, Бог во нивната потреба му дал на Ное дозвола да јаде од чистите животни кои ги повел со себе во бродот. Но животинската храна не била најздравиот прехранбен продукт за човекот. {СЖИ 373.1}
Луѓето кои живееле пред потопот јаделе животинска храна и ги прославувале своите страсти сѐ додека чашата на неправдата не се преполнила и Бог ја исчистил Земјата од таквото морално загадување со потоп. Тогаш на Земјата паднала третата страшна клетва. Првата била фрлена врз потомството на Адам и врз земјата, поради непослушноста. Втората клетва дошла за тлото откако Каин го убил својот брат Авел. Третата, најстрашна клетва од Бога на земјата дошла со потопот. {СЖИ 373.2}
По потопот луѓето јаделе многу животинска храна. Бог видел дека патиштата на човекот се расипани и дека тој посакал гордо да се издигне над својот Творец и да ги следи наклоностите на сопственото срце. и затоа дозволил долговечната раса да јаде животинска храна со што ги скрати нивните грешни животи. Набргу по потопот човештвото почнало забрзано да опаѓа во големината и должината на живеење. — Spiritual Gifts IV, 120, 121, 1864 {СЖИ 373.3}
Претпотопната расипаност
- Жителите на Стариот Свет биле неумерени во јадењето и пиењето. Тие јаделе месо иако Бог не им дозволил да јадат животинска храна. Јаделе и пиеле прекумерно и нивниот изопачен апетит не знаел за граници. Се оддале на гнасното идолопоклонство. Станале насилни и сурови и толку корумпирани што Бог веќе не можел да ги поднесе. Чашата на нивната неправда била полна, па Бог ја исчистил Земјата од ваквото морално загадување со потоп. Како што се множеле луѓето на Земјата по потопот, тие Го заборавиле Бога и ги расипале своите патишта пред него. Неумереноста во секој облик се зголемила до огромни размери. — How to Live ch.1, п. 52, 1865 {СЖИ 373.4}
Неуспехот и духовната загуба на Израел
- Исхраната којашто на човекот му била назначена на почетокот не вклучувала животинска храна. Дури по потопот, кога било уништено сето зеленило на Земјата човекот добил дозвола да јаде месо. {СЖИ 374.1}
При изборот на храна за човекот во Едем, Господ покажал кој е најдобриот начин на исхрана; истата поука ни ја покажал и кога го направил изборот за израелскиот народ. Тој ги извел Израелците од Египет, и раководел со нивната обука, за тие да можат да бидат Негов народ. Преку нив Тој сакал да го благослови и подучи светот. Им ја обезбедил најдобрата храна за таа цел, не месо, туку мана: „леб од небото”. Само поради нивното незадоволство и мрморењето за лонците со месо од Египет им била дозволена месна исхрана, но и тоа за кусо време. Нејзината употреба донела смрт и болести на илјадници. Па сепак, ограничувањето на безмесна исхрана никогаш не било во потполност прифатено. Тоа продолжило да биде причина за јавни или сокриени незадоволства и мрморење и никогаш не било постојано применувано. {СЖИ 374.2}
По нивното сместување во Ханан, на Израелците им било дозволено да јадат животинска храна, но со внимателни ограничувања, кои имале за цел да ги намалат лошите последици. Употребата на свинското месо била забранета, како и од други животни и птици чие месо било прогласено за нечисто. Од дозволените меса било најстрого забрането да се јаде мрснотијата и крвта. {СЖИ 374.3}
За храна можеле да се употребуваат само оние животни коишто биле во добра состојба. Ниту едно суштество кое било растргнато, умрено од природна смрт или чијашто крв не била внимателно исцедена не смеело да се користи како храна. {СЖИ 374.4}
Оддалечувајќи се од планот кој Бог го покажал за нивната исхрана, Израелците претрпеле голема загуба. Тие сакале месна исхрана и ги пожнеале резултатите од тоа. Не го постигнале Божјиот идеал на карактерот ниту ја исполниле Неговата цел. Бог „го исполни нивното барање, но прати пораз на душите нивни” (Псалм 106:15). Тие го вреднувале земското повеќе од духовното, па затоа светото првенство кое било Негова цел за нив не го добиле. — (1905) Здравје и среќа 311, 312 {СЖИ 375.1}
Безмесната исхрана го менува карактерот
- Господ јасно му кажал на Својот народ дека ќе го добијат секој благослов доколку ги држат Неговите заповеди и бидат особен народ. Тој ги предупредил преку Мојсеј во пустината, потенцирајќи дека здравјето ќе биде награда за послушност. Состојбата на умот е блиску поврзана со телесното здравје, а особено со здравјето на органите за варење. Општо земено, Бог не го обезбедил Својот народ со месна храна во пустината затоа што знаел дека ваквата исхрана ќе доведе до болести и непокорност. За да го модифицира карактерот и за активно да ги вклучи нивните умни способности, Тој го отстранил месото од мртвите животни од нив. Им дал ангелска храна, мана од небото. — Manuscript 38, 1898 {СЖИ 375.2}
Побуна и казната за неа
- Бог продолжил да ги храни Израелците со леб кој паѓал од небото; но тие не биле задоволни. Нивните изопачени апетити копнееле за месо, кое Бог, во Својата мудрост им го одземал… Сатаната, авторот на болестите и несреќата, ќе му се приближи на Божјиот народ онаму каде што може да има најголем успех. Тој во голема мерка го контролирал апетитот уште од времето на неговиот успешен експеримент со Ева, кога ја навел да јаде од забранетиот плод. Тој со своите искушенија прво дошол кај странците, односно кај Египтјаните кои поверувале и ги поттикнал на бунтовничко мрморење. Тие не биле задоволни со здравата храна што Бог ја обезбедил за нив. Нивните изопачени апетити копнееле по поголема разновидност, особено по месо. {СЖИ 375.3}
Ова мрморење наскоро се проширило кај речиси целиот народ. Најпрвин, Бог не им удоволил на нивниот апетит, туку предизвикал врз нив да падне Неговиот суд и ги уништил највиновните со молња од небото. Но, наместо да ги понизи, се чини дека тоа го зголемило нивното мрморење. Кога Мојсеј ги слушнал луѓето како плачат пред вратите од своите шатори и се жалат низ своите семејства бил мошне незадоволен. Тој ја изнел тежината на својата ситуација поради непокорниот дух на Израелците пред Господа, како и положбата на која Бог го поставил пред народот – положбата на грижлив татко, кој ќе страда заедно со страдањата на народот… {СЖИ 376.1}
Бог го упатил Мојсеј да собере пред Него седумдесет старешини, за кои знаел дека се водачи на народот. Тоа не биле само луѓе во понапредна возраст, туку достоинствени, со здраво расудување и искусни, кои биле квалификувани да бидат судии или началници. „Доведи ги кај скинијата на сведоштвото за да застанат таму заедно со тебе. Јас ќе слезам и ќе зборувам таму со тебе, ќе земам од Духот, Кој е во тебе, и ќе им наредам ним, да го носат заедно со тебе товарот на народот, а не ти сам да го носиш“ (Второзаконие 11:16,17). {СЖИ 376.2}
„А на народот кажи му: очистете се за утрешниот ден, и ќе јадете месо; зашто плачете пред Господа велејќи: – кој ќе нѐ нахрани со месо; добро ни беше во Египет, – затоа Господ ќе ви даде месо, и ќе јадете месо; ќе јадете не ден, не два, не пет дена, не десет и не дваесет дена, но цел месец ќе јадете, додека не ви излезе од ноздрите и не ви омрзне, затоа што Го презревте Господа, Којшто е меѓу вас, и плачете пред Него, велејќи: – што ни требаше да излегуваме од Египет? {СЖИ 376.3}
А Мојсеј рече: шест стотини илјади пешаци има во тој народ, меѓу кои сум и јас, а Ти велиш: Јас ќе им дадам месо, и ќе јадат цел месец! Зар треба да се заколат сите овци и волови, па да им биде доволно, или ќе се собере сета морска риба, па да ги задоволи? И му рече Господ на Мојсеј: Зар е раката Господова кратка: сега ќе видиш, ќе се оствари ли зборот Мој кон тебе, или не”. (Второзаконие 11:18-23) {СЖИ 376.4}
„Потоа ветар дувна од Господа, и донесе од кај морето потполошки и ги натрупа околу логорот на еден ден пат од едната страна и на еден ден пат од другата страна околу логорот, речиси до два лакта од земјата. Се крена народот, и целиот оној ден и цела ноќ и целиот нареден ден се собираа потполошки; и оној, кој малку собираше, и тој набра десет гомери: и си ги наредија околу логорот да се сушат” (Второзаконие 11:31,32). {СЖИ 377.1}
„Месото беше уште во нивните заби и уште не беше изедено, и се разгоре гневот Господов против народот, и Господ го порази народот со мошне голем пораз” (Второзаконие 11:33). {СЖИ 377.2}
Во овој случај Бог им го дал на луѓето она што не е најдобро за нив, затоа што тие тоа го сакале. Тие не се покориле да го примат од Бога она што ќе се покажало добро за нив. Тие се предале на бунтовнички мрморења против Мојсеј, и против Господа, затоа што не ги добиле оние нешта кои би се покажале штетни за нив. Нивните изопачени апетити ги контролирале, и Бог им дал животинско месо, како што сакале, и ги пуштил да страдаат од последиците на задоволувањето на својот стрвен апетит. Треските покосиле мноштво од луѓето. Оние кои биле највиновни за мрморењето биле погубени штом го вкусиле месото по кое копнееле. Доколку Му дозволеле на Бога да ја одбере нивната храна, и биле благодарни и задоволни од храната од која можеле да јадат слободно без штетни последици, тие не би ја загубиле Божјата наклоност, ниту би биле казнети за своето бунтовничко мрморење со погубувањето на мнозина од нив. — Spiritual Gifts 4а, 15-18, 1864 {СЖИ 377.3}
Божјата цел за Израел
- Кога Бог ги извел децата на Израел од Египет, Негова цел била да ги насели во Хананската земја како чист, здрав и среќен народ. Да ги погледнеме средствата преку кои Тој би го постигнал тоа. Тој ги подложил на тренинг на дисциплина кој, доколку бил внимателно следен, ќе резултирал со добро како за нив, така и за нивното потомство. Тој во голема мерка ја отстранил месната храна од нив. Им дозволил месо поради нивните барања, токму пред да стигнат до Синај, но и тоа само за еден ден. Бог можел да обезбеди месо исто толку лесно како и маната, но ограничувањето било ставено врз луѓето за нивно добро. Негова цел била да им овозможи на луѓето храна која е посоодветна за нивните потреби отколку трескавичната исхрана на која мнозина од нив биле навикнати во Египет. Изопачениот апетит требал да биде доведен во поздрава состојба, за да можат да уживаат во храната која првично им била наменета на луѓето -плодовите на земјата, кои Бог им ги дал на Адам и Ева во Едем. {СЖИ 377.4}
Доколку тие биле подготвени да се откажат од апетитот како знак на послушност на Неговите ограничувања, слабостите и болестите би биле непознати помеѓу нив. Но тие не сакале да им се покорат на Божјите барања, и не успеале да го достигнат стандардот кој Бог го поставил за нив и да ги примат благословите што можеле да бидат нивни. Тие мрмореле поради Божјите ограничувања и копнееле за лонците со месо од Египет. Бог им дозволил да имаат месо, но тоа се покажало како проклетство за нив. — (1890) христијанска умереност, 118, 119 {СЖИ 378.1}
Пример за нас
- „А тоа беа примери за нас, за да не бидеме похотливи на злото, како што тие беа похотливи”. „Сето тоа стануваше, та да служат како пример, а беше напишано за поука на нас, до кои стигна крајот на вековите” (1. Коринтјаните 10:6,11). {СЖИ 378.2}
- Општо земено, црквата во Батл крик воопшто не го поткрепувала Институтот со пример. Тие не ја вреднувале светлината на здравствената реформа со тоа што ќе ја внесат во своите семејства. Болестите кои посетија многу семејства во Батл Крик не требале да се случат, доколку тие го следеа светлото кое Бог им го даде. Како древниот Израел, тие не ја почитувале светлината, и не можеле да ја согледаат потребата од ограничувањето на своите апетити повеќе од древниот Израел. Децата на Израелот сакале месо и, како мнозина денес, велеле: „ќе умреме без месо”. Бог му дал месо на бунтовничкиот Израел, но со него дошла и неговата клетва. Илјадници од нив умреле додека месото што го посакувале сѐ уште било меѓу нивните заби. Ние го имаме примерот на древниот Израел и предупредувањето да не го правиме она што тие го сториле. Приказната за нивното неверување и побуна е оставена во записот како посебно предупредување дека ние не треба да го следиме нивниот пример и да мрмориме против Божјите барања. Како можеме да бидеме толку рамнодушни, одбирајќи лично проклетство, следејќи ја нашата сопствена виделина и да се оддалечуваме сѐ подалеку и подалеку од Бога, како што сториле Евреите? Бог не може да направи големи нешта за Својот народ поради тврдоста на нивните срца и нивното грешно неверување. {СЖИ 378.3}
Бог не гледа кој е кој; но во секоја генерација, оние кои се плашеле од Господа и праведно работеле биле прифатени од Него; додека оние што мрмореле, не верувале и се бунтувале, нема да ја имаат Неговата милост ниту благословите ветени за оние кои ја сакаат вистината и чекорат во неа. Оние кои ја имаат светлината, а не ја следат, туку не ги почитуваат Божјите барања, ќе откријат дека нивните благослови се сменети со проклетства, а милостите наменети за нив со осуда. Бог сака да се научиме на понизност и послушност додека ја читаме приказната за древниот Израел, кој бил Негов одбран и посебен народ, но кој се уништил самиот себеси следејќи ги сопствените патишта. — (1873) 3. Сведоштво 171, 172 {СЖИ 379.1}
- Нашите навики во пиењето и јадењето покажуваат дали сме од светот или се
вбројуваме во оние коишто Бог, со Својот моќен меч на вистината ги издвоил од светот. Тие се Неговиот посебен народ, ревносни за добри дела. Бог проговорил во Својата Реч. Во случајот на Даниел и неговите тројца придружници се наоѓа проповед за здравствената реформа. Бог проговорил преку приказната за Древниот Израел од кој Тој сакал да ја отстрани месната исхрана за нивно добро. Тој ги хранел со леб од небото: „Човекот јадел ангелска храна; но тие го охрабрувале својот земски апетит; и колку повеќе ги насочувале своите мисли кон лонците со месо во Египет,толку повеќе ја мразеле храната што Бог им ја дал за да ги одржи физички, ментално и морално здрави. Тие копнееле по лонците со месо, и така го правеле истото што мнозина го прават во наше време. — (1900) 6. Сведоштво 372 {СЖИ 379.2}
[Дополнителни изјави во поглед на користењето на месото од претпотопниот свет и Израелците – 231, 233]
Назад кон првичната исхрана
Повторно и повторно ми е покажано дека Бог се обидува да нѐ врати назад, чекор по чекор, на Неговиот првичен план – човекот да се одржува од природните производи на земјата. — (1890) христијанска умереност, 119 {СЖИ 380.1}
- Зеленчукот, овошјето и житарките треба да ја сочинуваат нашата исхрана. Ниту еден грам месо не би требало да влезе во нашите желудници. Јадењето месо е неприродно. Ние треба да се вратиме кон Божјиот првичен план при создавањето на човекот. — Manuscript 115, 1903 {СЖИ 380.2}
- Зарем не е време сите да се стремат кон отфрлувањето на месната храна? Како можат оние кои сакаат да станат чисти, обновени и свети, за да уживаат во друштвото на небесните ангели, да продолжат да се хранат со нешто што е толку штетно и за душата и за телото? Како можат да убиваат Божји созданија за да го конзумираат нивното месо? Наместо тоа, нека се вратат кон здравата и вкусна храна која му била дадена на човекот во почетокот, и самите да практикуваат, но и да ги учат своите деца на милост кон немите суштества кои Бог ги создал и ги ставил под наше владеење. — (1905) Здравје и среќа 317 {СЖИ 380.3}
Подготовка за преобразување
- Меѓу оние кои го чекаат Господовото доаѓање, јадењето месо ќе биде конечно напуштено; месото ќе престане да биде дел од нивната исхрана. Ние секогаш треба да го имаме во предвид тој крај и да се трудиме да се стремиме кон него. Јас не можам да мислам дека јадејќи месо ние можеме да бидеме во согласност со светлината што Бог толку милостиво ни ја дал. Сите што се поврзани со нашите здравствени институции треба особено да се научат себеси да се одржуваат со овошје, житарки и зеленчук. Доколку во оваа работа се раководиме според принцип, доколку како христијански реформатори го едуцираме својот сопствен вкус, и ја доведеме нашата исхрана во согласност со Божјиот план, тогаш можеме да имаме влијание и врз другите за оваа тема, а тоа ќе Го задоволи Бога. — (1890) христијанска умереност, 119 {СЖИ 380.4}
- Најважната цел на човекот не треба да биде да го задоволи својот апетит. Постојат телесни потреби кои треба да се задоволат; но зарем е потребно човекот поради тоа да биде контролиран од апетитот? Зарем луѓето кои сакаат да бидат свети, чисти, обновени, за да можат да бидат примени во друштвото на небесните ангели, ќе продолжат да го одземаат животот на Божјите созданија и да уживаат во нивното месо како луксуз? Од она што Бог ми го покажал, редот на нештата ќе биде сменет, и Божјиот посебен народ ќе биде умерен во сѐ. — (1890) Counsels on Health, 116 {СЖИ 381.1}
- Оние коишто примиле упатства во врска со штетните последици од месната исхрана, чајот и кафето, како и подготвувањето тешки и нездрави јадења, и кои одлучиле да склучат завет со Бога преку жртва, нема да продолжат да го задоволуваат својот апетит со храна за која знаат дека е штетна. Бог побарува апетитот да биде исчистен, и да практикуваме самооткажување во врска со оние нешта кои не се добри. Тоа е работата што треба да ја завршиме пред да можеме да застанеме како Негов совршен народ пред Него. — (1909) 9. Сведоштво 153, 154 {СЖИ 381.2}
- Поради нејзино добро Бог ја советува црквата на остатокот да го отфрли месотот, чајот и кафето, како и другата штетна храна. Има многу други нешта со кои можеме да се одржуваме, а кои се здрави и добри.— Manuscript 71, 1908 {СЖИ 381.3}
Усовршување на светоста
- Помеѓу луѓето кои тврдат дека го очекуваат скорото Христово доаѓање треба да се видат поголеми реформи. Здравствената реформа треба меѓу нашиот народ да го заврши делото кое сѐ уште не е завршено. Има такви кои мораат да станат свесни за опасноста што ја носи јадењето месо, кои сѐ уште јадат животинско месо, загрозувајќи го на тој начин своето физичко, ментално и духовно здравје. Мнозина кои се денес само половично обратени по прашањето на јадење месо ќе заминат од Божјиот народ за да не одат повеќе со него. {СЖИ 382.1}
Во сите наши дела ние мораме да им се покориме на законите што Бог ги дал, за нашата физичка и духовна енергија да може да работи во хармонија. Луѓето можат да делуваат побожно, можат дури и да го проповедаат евангелието, а сепак да бидат неисчистени и непосветени. Проповедниците треба да бидат строго умерени во нивното јадење и пиење, за да не направат погрешни патеки за своите нозе, скршнувајќи ги хромите – слабите во вера- надвор од патот. Доколку, објавувајќи ја најсвечената и најважна порака што Бог некогаш ја дал, луѓето бидат против вистината, уживајќи во погрешни навики во јадењето и пиењето, тие ја одземаат целата силина на пораката што ја носат. {СЖИ 382.2}
Оние кои уживаат во јадењето месо, пиењето чај и алчноста, сеат семе од кое ќе пожнеат болка и смрт. Нездравата храна која ќе влезе во желудникот ги засилува апетитите кои се борат против душата и развиваат пониски склоности. Исхраната со животинско месо се стреми да развие животински тенденции. А тоа ја намалува духовноста и го онеспособува умот да ја разбере вистината. {СЖИ 382.3}
Божјата реч јасно нѐ предупредува дека доколку не се воздржиме од телесните уживања, нашата физичка природа ќе биде доведена во судир со духовната природа. Алчното јадење војува против здравјето и мирот. На тој начин се објавува војна помеѓу пониската и повисоката природа на човекот. Ниските страсти, силни и активни, ѝ се спротивставуваат на душата. Највисоките интереси на душата се загрозени со задоволувањето на апетитот без Небесните ограничувања. — (1902) Counsels on Health, 575, 576 {СЖИ 382.4}
- Оние коишто тврдат дека веруваат во вистината треба внимателно да ги чуваат
силите на телото и умот, за Бог и Неговото дело на ниту еден начин да не бидат обесчестени од нивните зборови или дела. Навиките и делата треба да бидат доведени во согласност со Божјата волја. Треба да обрнеме големо внимание на нашата исхрана. Јасно ми е покажано дека Божјиот народ треба да застане цврсто против јадењето месо. Зарем Бог цели 30 години ќе му ја упатуваше на Својот народ пораката дека треба да престанат да јадат месо доколку сакаат да имаат чиста крв и јасен ум, ако не сакал Неговиот народ да се придржува до тоа? Со употребата на животински меса се засилува нашата животинска природа, а заслабнува духовната природа. — Letter 48, 1902 {СЖИ 383.1}
- Моралните зла од месната исхрана не се помалку обележани од физичките неволји. Месната храна е штетна за здравјето, а сѐ што се одразува на телото, соодветно ќе се одрази и на умот и душата. Помислете само на суровоста кон животните која ја вклучува јадењето месо, како и на ефектот од тоа врз оние кои го убиваат животното и оние кои се вклучени во тоа. Колку тоа ја уништува нежноста со која треба да се однесуваме кон вие Божји суштества! — (1905) Здравје и среќа 315 {СЖИ 383.2}
- Широката употреба на месото од мртвите животни имала уништувачки последици врз моралот, како и врз физичката градба на човекот. Доколку ги погледнеме резултатите од лошото здравје, во неговите најразлични облици и тргнеме да ја бараме причината за тоа, сигурно ќе стигнеме до јадењето месо. — Manuscript 22, 1887 {СЖИ 383.3}
- Оние коишто јадат месо ги занемаруваат сите предупредувања што Бог ги дал во врска со ова прашање. Тие немаат никаков доказ дека чекорат по сигурна патека. Немаат никаков изговор за јадењето месо од мртви животни. Врз животинскиот род почива Божјото проклетство. Многу пати кога се јаде месо, тоа се распаѓа во стомакот и предизвикува болести. Карциномите, туморите и белодробните заболувања се во многу предизвикани токму од јадењето месо. — Pacific Union Recorder, Oct. 9, 1902 {СЖИ 383.4}
- О, кога сите би можеле да ги согледаат овие теми онака како што ми се покажани мене, оние кои сега се толку безгрижни, толку рамнодушни во врска со изградувањето на сопствениот карактер; оние коишто копнеат за уживањето во месната исхрана, никогаш не би ги отвориле своите усни за да го оправдаат апетитот за месото од мртви животни. Таквата исхрана ја загадува крвта во нивните вени и ги стимулира ниските животински страсти. Ја заслабнува острината на запазувањето и живоста на мислата за разбирањето на вистината и знаењето за себеси. — Manuscript 3, 1897 {СЖИ 384.1}
Јадењето месо е посебно опасно денес
- Месото никогаш не било најдобрата храна; но неговата употреба денес е двојно непогодна поради толку забрзаниот пораст на болестите кај животните. — (1905) Здравје и среќа 313 {СЖИ 384.2}
- Животните стануваат сѐ повеќе и повеќе болни, и нема да помине долго пред
животинската храна да биде отфрлена од мнозина кои не се Адвентисти на седмиот ден. Треба да се подготвуваат јадења кои се здрави и го подржуваат животот, па мажите и жените нема да имаат потреба да јадат месо. — (1900) 7. Сведоштво 124 {СЖИ 384.3}
- Кога оние што ја знаат вистината ќе застанат во одбрана на здравите принципи за овој и за вечниот живот? Кога ќе бидат искрени кон принципите на здравствената реформа? Кога ќе научат дека е опасно да се јаде месо? Поучена сум да кажам дека ако јадењето месо воопшто било безопасно некогаш, денес воопшто не е така. —Manuscript 133, 1902 {СЖИ 384.4}
- Светлината која ми е дадена вели дека набргу ќе треба да се откажеме од употребата на секаква храна од животинско потекло. Дури и млекото ќе треба да биде отфрлено. Болестите бргу се множат. Божјото проклетство е на Земјата, бидејќи човекот го предизвикал тоа. Навиките и делата на луѓето ја довеле Земјата во состојба во која за човечкото семејство мора да се изнајде друга храна, која не е од животинско потекло. Нам воопшто не ни е потребна месна исхрана. Бог може да ни даде нешто друго. — Union Conference Record, July 28, 1899 {СЖИ 384.5}
- Кога само би ја познавале природата на месото што го јадете, кога би можеле да го видите живо животното чие мртво месо го јадете, со гадење би се одвратиле од вашите месни оброци. Истите тие животни кои вие ги јадете се често толку заболени што, оставени, би умреле самите; но додека во нив е здивот на животот, биле убиени и донесени на пазарот. Вие во вашиот организам директно внесувате сокови и отрови од најлош вид, а не сте свесни за тоа. — (1870) 2. Сведоштво 404, 405 {СЖИ 385.1}
Страдањата на животните и последиците од тоа
- Животните често се изнесуваат на пазар и се продаваат како храна, кога се толку заболени што на нивните сопственици им е страв подолго да ги чуваат. И некои од постапките за нивно одгледување за пазарот предизвикуваат болести. Оставени без сончева светлина и чист воздух, вдишувајќи ја атмосферата на нечистите штали, можеби и хранејќи се со храна која се распаѓа, целото нивно тело наскоро станува загадено со штетни состојки. {СЖИ 385.2}
Животните често се транспортираат на големи далечини и се подложени на големо страдање додека не стасаат до пазарот. Одведени од зелените пасишта, патувајќи илјадници километри по жештината и правливите патишта, или пренатрупани во нечисти камиони, трескавични и исцрпени, често повеќе часови без храна и вода, кутрите животни се возат кон својата смрт, за луѓето да можат да се насладуваат со нивните лешеви. — (1905) Здравје и среќа 314 {СЖИ 385.3}
- Мнозина умираат од болести кои се во потполност предизвикани со јадењето месо; па сепак, се чини дека светот не станува помудар. Често се убиваат животни кои патувале големи далечини до кланиците. Нивната крв станала загреана. Тие се згоени и лишени од здраво движење, па кога треба да патуваат далеку стануваат нервозни и исцрпени и во таква состојба се убиваат за Пазар. Нивната крв е многу трескавична и оние кои јадат од нивното месо, јадат отров. Некои не го чувствуваат веднаш неговото влијание, додека други веднаш ги пресекува болка и умираат од треска, колера или некои непознати болести. {СЖИ 385.4}
Многу од животните продадени за градските пазари биле заболени при продажбата и нивните сопственици го знаеле тоа, па дури и оние кои ги купиле не секогаш не се свесни за тоа. Ова особено се практикува во голема мерка во поголемите градови во кои месојадците не знаат дека јадат месо од заболени животни. {СЖИ 386.1}
Некои од животните водени на кланица, се чини, инстиктивно разбираат што ќе се случи, па стануваат возбудени и буквално луди. Нив ги убиваат во таква состојба и го подготвуваат нивното месо за пазарот. Нивното месо е затруено и, кај оние коишто го јаделе, предизвикало грчеви, болка, инфаркт и ненадејна смрт. Па сепак, причината за сите овие страдања не му се припишува на месото. {СЖИ 386.2}
Некои од животните биле нехумано третирани додека биле водени на кланица. Тие биле буквално измачувани и, дури по многу часовно страдање, убиени. Свињите се подготвуваат за пазарот дури и кога меѓу нив беснееше чума, а нивното месо ширеше заразни болести и донесе многу смрт. — Spiritual Gifts IV, 147, 148, 1864 {СЖИ 386.3}
Физичките последици од јадењето месо ја намалуваат отпорноста кон заболувањата и ненадејната смрт
- Подложноста на заболувања со јадењето месо се зголемува за десет пати. — (1868) 2. Сведоштво 64 {СЖИ 386.4}
- Лекарите во светот не можат да го објаснат брзото зголемување на болестите помеѓу човештвото. Но ние знаеме дека многу од овие страдања се предизвикани од јадењето месо. — Letter 83, 1901 {СЖИ 386.5}
- Животните се заболени и, јадејќи го нивното месо, ние сееме семе на болест во нашето ткиво и крвта. Потоа, ако бидеме изложени на промени во маларична околина, ние тие промени ги чувствуваме многу посилно; или, кога ќе бидеме изложени на епидемични или заразни болести, нашиот организам нема да биде во состојба да ѝ се спротивстави на болеста. — (1896) Extracts from Unpublished Testimonies in Regard to Flesh Foods, 8 {СЖИ 386.6}
- Вие сте полни, но тоа не е добар материјал. Вам ви е само полошо поради вашата телесна тежина. Кога секој од вас би се подложил на поедноставна исхрана, која би намалила 12-15 килограми од вашата тежина, би биле многу помалку подложни на заболувања. Јадењето месо кај вас довело до слаб квалитет на крвта и ткивото. Вашите органи се во трескавична состојба, подготвени да заболат. Подложни сте на акутни напади на болест и на ненадејна смрт, бидејќи вашата градба ја нема потребната сила да се соочи со болеста и да ѝ се спротивстави. ќе дојде време кога силата и здравјето со кое си ласкате ќе се покажат како слабост. — (1868) 2. Сведоштво 61 {СЖИ 387.1}
Заболена крв
- Поттикната сум од Божјиот Дух пред некои да го изнесам фактот дека нивните
страдања и слабото здравје се предизвикани од непочитувањето на светлината која им е дадена за здравствената реформа. Јас сум им покажала дека нивната месна исхрана, која за нив е главен извор на храна, не е потребна и дека, бидејќи се изградени од она што го јадат, нивниот мозок, коските и мускулите се во нездрава состојба, затоа што се одржуваат со месо од мртви животни; дека нивната крв е расипана со оваа несоодветна исхрана; дека месото кое го јаделе било заболено и дека целиот нивни организам станува згоен и затруен. — (1896) Extracts from Unpublished Testimonies in Regard to Flesh Foods, 4 {СЖИ 387.2}
- Месото ја намалува вредноста на крвта. Гответе го месото со зачини и јадете го со богати слатки и пити и ќе имате крв со лош квалитет. Месните пити и туршијата, кои никогаш не би требало да влезат во човечкиот желудник даваат лош квалитет на крвта. А лошиот квалитет на храната, зготвена на несоодветен начин, и во незадоволителни количини, не може да даде добра крв. Месото и тешките јадења, како и недоволната храна ќе дадат исти резултати. — (1870) 2. Сведоштво 368 {СЖИ 387.3}
Од светлината што Бог ми ја дал, распространетоста на ракот и туморот се должи главно од хранењето на месо. — (1896) Extracts from Unpublished Testimonies in Regard to Flesh Foods, 7 {СЖИ 388.1}
- Карциномите, туморите и сите воспаленија се главно предизвикани од јадењето месо. {СЖИ 388.2}
Карцином, туберкулоза, тумори
- Месната исхрана е сериозно прашање. Треба ли човечките суштества да живеат од месото на мртви животни? Одговорот, според светлината што Бог ни ја дал, е не, категорично не. Институциите на здравствената реформа треба да едуцираат по ова прашање. Лекарите кои тврдат дека го разбираат човечкиот организам не смеат да ги охрабруваат своите пациенти да се одржуваат со месото на мртвите животни. Тие треба да укажат на зголемувањето на болестите помеѓу животните. Истражувањата покажуваат дека многу малку животни се здрави и дека навиката да се јаде многу месо донесува секакви видови болести – ракови, тумори скрофули (туберкулоза на лимфните жлезди), туберкулоза и други слични заболувања. — Manuscript 3, 1897 {СЖИ 388.3}
- Оние коишто се на месна исхрана знаат малку за тоа што го јадат. Често, кога би можеле да го видат животното додека било живо и кога би го познавале квалитетот на месото што го јадат, со гадење би се одвратиле од тоа. Луѓето постојано јадат месо полно со туберкулозни и канцерогени честички. На тој начин заболуваат од туберкулоза, карцином и други фатални болести. — (1905) Здравје и среќа 313 {СЖИ 388.4}
- Трпезите на многу жени коишто тврдат дека се христијанки секојдневно се полни со различни јадења кои предизвикуваат трескавична состојба во организмот. Месото е главниот извор на храна на масите во многу семејства, додека нивната крв се полни со канцерогени и скрофулозни честички. Нивните тела се составени од она што тие го јадат. Но кога ќе ги снајдат страдања и болест, тоа се смета за Божја волја. — (1875) 3. Сведоштво 563 {СЖИ 388.5}
Намалена живост на умот
- Оние кои неограничено употребуваат месо, немаат секогаш јасен ум и активен интелект, бидејќи употребата на животинско месо претендира да доведе до гојазност и да ја намали чувствителноста на умот. — (1890) Counsels on Health, 115 {СЖИ 389.1}
- Бог сака моќта за запазување на Неговиот народ да биде јасна и способна за тешка работа. Но доколку живеете на месна исхрана, не треба да очекувате вашиот ум да биде плодоносен. Мислите мораат да бидат исчистени; тогаш Божјиот благослов ќе почива врз неговиот народ. — The General Conference Bulletin, April 12, 1901 {СЖИ 389.2}
- За оние кои неограничено јадат месо е невозможно да имаат јасен ум и активен интелект. — (1868) 2. Сведоштво 62, 63 {СЖИ 389.3}
- Постои алармантна затапеност во несвесната чувствителност. Јадењето месо е вообичаена појава Тоа ги стимулира пониските страсти на човечкиот организам. — (1896) Extracts from Unpublished Testimonies in Regard to Flesh Foods, 4 {СЖИ 389.4}
- Месната исхрана го менува карактерот и го засилува животинското во нас. Ние сме составени од она што го јадеме, а јадењето многу месо ќе ги намали интелектуалните активности. Учениците би постигнале многу повеќе во учењето кога никогаш не би јаделе месо. Кога животинскиот дел од човекот се засилува со јадењето месо, пропорционално со тоа опаѓаат интелектуалните моќи. Религиозниот живот може многу поуспешно да се постигне и одржи доколку го отфрлите месото, бидејќи ваквата исхрана, преку силината со која дејствува ја зголемува похота, а ја намалува моралната и духовната природа на човекот. „Телото сака спротивни работи на духот, а духот – спротивни на телото” (Галатјаните 5:17). — (1896) Extracts from Unpublished Testimonies in Regard to Flesh Foods, 7 {СЖИ 389.5}
Ги засилува ниските страсти
- Ако некогаш постоело време кога исхраната треба да биде од наједноставен вид, тоа е сега. Пред децата не треба да се изнесува месо. Неговото влијание ги возбудува и засилува пониските страсти, и има тенденција да ги намали моралните сили. — (1869) 2. Сведоштво 352 {СЖИ 389.6}
- Поучена сум дека употребата на месо во исхраната тежнее да ја анимализира природата и да им ја одземе на мажите и жените љубовта и симпатиите што би требале да ги чувствуваат кон сите луѓе. Ние сме изградени од она што го јадеме, и оние чијашто исхрана главно се состои од животински преработки се доведуваат во состојба во која им дозволуваат на пониските страсти да ја преземат контролата над повисоките сили на душата… {СЖИ 390.1}
Ние не означуваме никаква прецизна линија којашто треба да се следи во исхраната. Постојат многу видови здрава храна. Но, велиме дека месото не е соодветна храна за Божјиот народ. Тоа го анимализира човечкото суштество. Во земја како оваа, во која има овошје, житарки и зрнести плодови во изобилство, како може некој да помисли дека може да јаде месо од мртви животни? — Manuscript 50, 1904 {СЖИ 390.2}
- Кога во семејствата од кои се составени нашите цркви работите би стоеле онака како што треба, ние би можеле да извршиме двојна служба за Господа. Дадена ми е светлина дека во врска со здравствената реформа треба да се објави најодлучната порака. Оние коишто употребуваат месо ги засилуваат пониските страсти и им подготвуваат пат на болестите кои ќе се залепат за нив. — Letter 200, 1903 {СЖИ 390.3}
- Вашето семејство се одржува главно со месо, па кај вас се засилени животинските страсти, додека интелектуалното е заслабнато. Ние сме составени од она што го јадеме, и доколку се одржуваме главно со месо од мртви животни, тогаш ќе ја попримиме нивната природа. Вие сте го поддржувале погрубиот дел од вашата природа, заслабнувајќи го порафинираниот. — (1868) 2. Сведоштво 60, 61 {СЖИ 390.4}
- Ние сакаме вистината на Божјата Реч која поттикнува да дојде до секој еден од нашиот народ пред да заврши состанокот. Сакаме тие да разберат дека животинското месо не е соодветна храна за нив. Таквата исхрана кај нив и нивните деца ги негува животинските страсти. Бог сака да ги поучиме нашите деца на правилни навики во јадењето, облекувањето и работата. Тој сака да направиме сѐ што можеме за да ја поправиме веќе расипаната машинерија. — General Conference Bulletin, April 12, 1901 {СЖИ 390.5}
[Влијанието на месото и богатата храна врз децата – 348, 350, 356, 357, 361, 578, 621, 711]
Најсигурниот пат
- Интелектуалните, моралните и физичките сили се намалуваат со навиката на јадење месо. Јадењето месо го заслабнува организмот, го замаглува интелектот и ја затапува моралната чувствителност. Ви велиме, драги брате и сестро, најсигурниот пат е да го оставите месото. — (1868) 2. Сведоштво 64 {СЖИ 391.1}
Непрепознаената причина
- Последиците од месната исхрана не мораат веднаш да се согледаат; но тоа не е доказ дека таа не е штетна. Малкумина можат да се натераат да веруваат дека месото што го јаделе ја загадило нивната крв и ги предизвикало нивните страдања. — (1905) Здравје и среќа 315 {СЖИ 391.2}
- Оваа тема ми е покажана од различни аспекти. Смртноста предизвикана со јадењето месо не е признаена; кога би биле ние веќе не би слушале аргументи и оправдувања во полза на задоволувањето на апетитот со мртво месо. Имаме многу добри нешта за да го задоволиме апетитот, без да ставаме лешеви на нашите трпези и да правиме од нив составен дел од нашето мени. — (1896) Extracts from Unpublished Testimonies in Regard to Flesh Foods, 8 {СЖИ 391.3}
- Мнозина умираат од болести кои во потполност се должат на јадењето месо; во меѓувреме, ниту тие, ниту другите не се многу свесни за вистинската причина за тоа. Некои не ги чувствуваат веднаш неговите последици, но тоа не е доказ дека месото не им наштетило. Тоа може полека но сигурно да го прави своето на организмот, а за тоа време жртвата да не биде свесна за тоа. — (1890) Counsels on Health, 115 {СЖИ 391.4}
- Постојано велите во одбрана на вашето попуштање на јадењето месо: „Колку и да е тоа штетно за другите, за мене не е штетно, па јас го јадам цел живот!” Но не знаете колку поздрави би биле кога би се воздржувале од јадењето месо. — (1868) 2. Сведоштво 61 {СЖИ 391.5}
Свинското посебно осудено
- Бог ви дал светлина и знаење, за кое сте признале дека доаѓа директно од Него, и во кое Тој ве поучува да го победите апетитот. Вие знаете дека употребата на свинското месо е во спротивност со Неговата директна заповед, дадена не затоа што Тој сакал посебно да го истакне Својот авторитет, туку затоа што тоа е штетно за оние кои го јадат. Неговата употреба ќе предизвика загадување на крвта, при што шкрофулата и други честички ќе го загадат системот, при што ќе страда целиот организам. Особено ќе заслабнат фините, чувствителни мозочни нерви, кои ќе станат толку замаглени што нема да можете да ги препознавате светите нешта, туку ќе ги ставите на пониско ниво заедно со обичните нешта.— (1868) 2. Сведоштво 96 {СЖИ 392.1}
- Ткивото на свинското месо е преполно со паразити. За свинското месо Бог рекол: „Од месото нивно да не јадете, ниту, пак, до мршите нивни да не се допирате – тие се за вас нечисти” (Броеви 11:8). Оваа заповед е дадена затоа што свинското месо е неподобно за храна. Свињите се хранат со нашите нечисти отпадоци и тоа е единствената намера на која тие се создадени да ѝ служат. Никогаш, под никакви околности, нивното месо не би требало да биде јадено од човечките битија. — (1905) Здравје и среќа 313, 314 {СЖИ 392.2}
- Свинското, иако еден од најчестите продукти во исхраната, е еден од најштетните. Бог не им забранил на Евреите да јадат свинско само за да го покаже Својот авторитет, туку затоа што тоа не е соодветен артикал за човечка исхрана. Тоа ќе го наполни организмот со скрофули, а особено во онаа топла клима ќе доведе до лепра и разни други болести. Неговото влијание на организмот во оние климатски услови било далеку поштетно отколку во подрачја со постудена клима. Но Бог никогаш не го наменил свинското да биде храна, под никакви услови. Незнабошците употребувале месо како дел од исхраната, а Американците го употребувале слободно како важен дел од исхраната. Во својата природна состојба свинското месо воопшто не би било вкусно. Зачините се оние кои го прават пријатно за вкусот, со што уште повеќе се влошува и онака многу лошата работа. Повеќе од сите други меса, свинското месо ја влошува состојбата на крвта. Оние кои слободно јадат свинско месо, не можат да не бидат болни. Оние кои многу се рекреираат на отворено не ги чувствуваат лошите последици од јадењето свинско како оние коишто поголемото време го поминуваат во затворени простории и кои малку се движат, а работат умствена работа. Но со јадењето свинско не се нарушува само физичкото здравје. Тоа има влијание и на умот, и најфините сетила се замаглуваат со употребата на овој одвратен прехранбен производ. Организмот на ниту едно живо суштество не може да биде здрав, ако неговата природна средина е ѓубрето и се храни се секакви одвратни нешта. Свинското месо е составено од она што свињите го јадат. Доколку луѓето го јадат нивното месо, нивната крв, и нивниот организам ќе биде загаден од нечистотиите што ги внесуваат во себе преку свинското месо. {СЖИ 393.1}
Јадењето свинско довело до скрофули, лепра и канцерогени заболувања. Јадењето свинско сѐ уште ги предизвикува најтешките страдања на човечкиот род. — (1865) How to Live ch.1, p.58 {СЖИ 393.2}
[Ставот на Даниел кон свинското месо – 34]
Животински маснотии и крв
- Како семејство, вие сте далеку од тоа да бидете слободни од болестите. Вие сте употребувале животински маснотии кои Бог во Својата реч изрично ги забранил: „Никаков лој и никаква крв да не јадете” (Броеви 3:17). „Никаква крв да не јадете во сите живеалишта свои, ни од кое било животно, ниту, пак, од птици. А кој ќе јаде било каква крв, ќе се истреби од народот свој!” (Броеви 7:26,27). — (1868) 2. Сведоштво 61 {СЖИ 393.3}
- Месото се послужува со мирис на маст, затоа што тоа му одговара на изопачениот вкус. И крвта и маснотиите од животните се консумираат како специјалитети. Но Бог дал јасни упатства дека тоа не треба да се јаде. Зошто? Затоа што нивната употреба ќе доведе до болен крвоток во човечкиот организам. Непочитувањето на Божјите особени упатства донело мноштво тегоби и болести во човештвото… Доколку луѓето во својот организам го внесуваат она што не може да создаде добро ткиво и крв, тие ќе мораат да ги поднесуваат последиците од своето непочитување на Божјата реч.— Letter 102, 1896 {СЖИ 393.4}
Рибите често се загадени
- Во многу места рибите станале толку загадени од нечистотијата со којашто се хранат така што станале причина за болести. Тоа е посебно случај онаму каде што рибите доаѓаат во допир со отпадоците од големите градови. Рибите кои се хранат со содржината од канализацијата можат да отидат во далечните води и да бидат фатени онаму каде што водата е чиста и свежа. На тој начин, користени како храна, тие ќе доведат до болести и смрт кај оние кои не се сомневаат на опасноста. — (1905) Здравје и среќа 314, 315 {СЖИ 394.1}
Препознавање на итните услови
- Кога можеме да набавиме доволно добро млеко и овошје, речиси и да немаме изговор за јадење храна од животинско потекло; не е потребно да се одзема животот на било кое Божјо создание за да ги задоволиме нашите основни потреби. Во одредени случаи на болест или исцрпеност можеби ќе биде најдобро да се употребува малку месо, но треба да се поведе многу грижа тоа да биде од здрави животни. Се поставува многу сериозно прашање дали во денешниот свет е воопшто безбедно да се јаде било каква храна од животинско потекло. Подобро е никогаш да не се јаде месо отколку да се употребува месо од животни кои не се здрави. Кога не сум можела да ја снабдам храната која ми е потребна, понекогаш сум јадела малку месо; но сѐ повеќе и повеќе се плашам од него. — (1890) христијанска умереност, 117, 118 {СЖИ 394.2}
[Елена Вајт некогаш била присилена да јаде малку месо – Додаток 1:10]
- Некои искрено мислат дека соодветната исхрана се состои главно од каши. Јадењето многу каши нема да ви обезбеди здрави органи за варење; бидејќи кашите се премногу течни. Заземете се за јадење овошје, зеленчук и леб. Месната исхрана не е најздравата исхрана, но сепак не заземам став дека месото треба сите да го отфрлат. Оние кои имаат воспаление на дигестивните органи можат често да употребуваат месо, кога нема да можат да јадат овошје, зеленчук или каша. Доколку сакаме да се одржиме во најдобро здравје, ќе одбегнуваме јадење овошје и зеленчук во ист оброк. Доколку желудникот е воспален, тоа ќе предизвика неволји, ќе го замагли умот кој нема да биде во состојба да издржи ментални напрегања. Јадете овошје во еден, а зеленчук во друг оброк… {СЖИ 394.3}
Колачите, пудинзите и благите преливи ќе ги нарушат органите за варење; и зошто да ги доведуваме во искушение оние околу масата со поставување вакви јадења пред нив? Колку повеќе месо се користи во исхраната на наставниците и учениците, толку помалку мозокот ќе биде приемчив за духовните нешта. Се зајакнуваат животинските нагони, а се замаглува фината чувствителност на умот. Вредното учење не е главната причина за исцрпување на менталните сили. Главната причина за тоа е несоодветната исхрана, нередовните оброци и недостигот на физичките вежби. Нередовното јадење и спиење ги поткопуваат менталните сили. — The Youth’s Instructor, May 31, 1894 {СЖИ 395.1}
[Во нашите институции во 1884 година не било подготвено месото целосно да се отстрани, и покрај тоа што тој чекор подоцна ќе се направи – 720]
[Здравото месо е попожелно од неограничената употреба на млекото и шеќерот – 527, 533]
[Лекарите мора да зборуваат за одвикнување од месото, а не да го забрануваат – 434, 438]
[Непромисленото оставање на месната храна од оние кои умираат од туберкулоза – 435]
[Месната храна не смее да се осуди, доколку нема одговарачка безмесна храна како замена – 796]
[Месната храна не е вистинска храна за Божјиот народ во земјите во кои во изобилство има овошје, житарки и зрнести плодови – 719]
[Месото сервирано на пациентите во нивните соби во санаториумите – 437]
Исхраната без месо е соодветна
- Месото не е суштествено за здравјето или силата. Во спротивно, тоа би значело дека Бог згрешил со храната што ја одбрал за Адам и Ева пред паѓањето во грев. Сите хранливи состојки можеме да ги најдеме во овошјето, зеленчукот и житарките. — The Review and Herald, May 8, 1883 {СЖИ 395.2}
- Погрешно е да се мисли дека силата на нашите мускули зависи од животинска храна. Потребите на организмот можат да бидат подобро задоволени и ќе можеме да уживаме во подобро здравје доколку не ја употребуваме истата. Житарките, заедно со овошјето, зрнестите плодови и зеленчукот ги содржат сите потребни хранливи елементи за создавање на добра крв. Овие состојки нема да можеме да ги задоволиме ниту толку добро ниту толку потполно со употреба на животинска исхрана. Кога месото би било суштествено за нашето здравје и силата, тогаш храната од животинско потекло би била вклучена во исхраната која му била назначена на човекот во почетокот. — (1905) Здравје и среќа 316 {СЖИ 396.1}
Зошто да јадеме храна од втора рака?
- Животните се хранат со зеленчук и житарки. Мора ли зеленчукот да стане составен дел на животинскиот организам пред да го употребиме? Треба ли да го внесуваме нашиот зеленчук така што ќе јадеме месо од мртви суштества? Бог за Нашите прародители обезбедил плодови во нивната природна состојба. Тој му дал на Адам да управува со градината и да се грижи за неа со зборовите: „Тоа да ви биде за храна” (Битие 1:29). Ниту едно животно не требало да убива други животни за да се прехрани. — Letter 72, 1896 {СЖИ 396.2}
- Оние кои јадат месо, всушност само јадат житарки и зеленчук од втора рака; бидејќи животните од нив ги добиваат состојките поради кои растат. Животот кој бил во житарките и зеленчукот поминува во оној кој ги јаде. Ние го примаме јадејќи го месото на животните. Колку е подобро да тоа го добиваме директно, така што ќе ја јадеме храната која Бог ја наменил за нас! — (1905) Здравје и среќа 313 {СЖИ 396.3}
Месото е типично стимулативно средство
- Кога ќе се престане со употребата на месото, често доаѓа до чувство на слабост, на недостиг на живост. Мнозина го користат тоа како доказ дека месото е неопходно; но тоа е затоа што овој вид храна е стимулативен, затоа што ја прави крвта трескавична и ги надразнува нервите и поради тоа толку им недостасува. Некои ќе откријат дека да се престане со јадењето месо е исто толку тешко како што за алкохоличарот е тешко да се откаже од пиењето; Но на таквите ќе им биде подобро да ја направат промената. — (1905) Здравје и среќа 316 {СЖИ 396.4}
[За контекст види 61]
- Месото е исто така штетно. Неговиот природен стимулативен ефект би требал да биде доволна причина за негово оставање; а речиси универзално лошата здравствена состојба на животните уште повеќе ја доведува во прашање неговата употреба. Тоа тежнее да ги надразнува нервите и да ги засили страстите, на тој начин нарушувајќи го нашиот внатрешен баланс во полза на ниските нагони. — (1903) Воспитување 203 {СЖИ 397.1}
- На некој начин ме изненади вашиот аргумент за тоа како месото ве одржува силен, бидејќи, доколку се изземеш себеси, разумот ќе ти каже дека месната исхрана нема толку предимства колку што ти тврдиш. Ти самиот знаеш што треба да му се одговори на пушачот кога, за да ја оправда употребата на тутунот, ги истакнува неговите предности! Истото го правиш и ти за оправдување на месната исхрана. {СЖИ 397.2}
Слабоста што ја чувствуваш поради оставањето на месото е еден од најсилните аргументи што можам да ти ги посочам зошто треба да престанеш да јадеш месо. Оние кои јадат месо по јадењето на оваа храна се чувствуваат стимулирани и претпоставуваат дека станале посилни. Откако некој ќе го остави месото, може извесно време да чувствува одредена слабост, но кога организмот ќе биде исчистен од последиците на ваквата исхрана, тој веќе нема да чувствува слабост, и ќе престане да го посакува она за кое тврдел дека е суштествено за неговата сила. — Letter 73а, 1896 {СЖИ 397.3}
[Елена Вајт чувствувала слабост кога јадела многу месо – Додаток 1:4, 5, 10]
[Борбата на Елена Вајт при оставањето на месната исхрана – Додаток 1:4, 5]
Погрижете се за замена
- Кога ќе го оставите месото, неговото место треба да биде пополнето со мноштво житарки, зрнести плодови, зеленчук и овошје кои ќе бидат и хранливи и вкусни. Ова е особено важно за оние кои се слаби и обременети со постојана работа. Во некои земји, во кои владее сиромаштија, месото е најевтина храна. Под вакви околности е многу тешко да се направи промена; но не и невозможно. Сепак, треба да ја имаме предвид состојбата на луѓето, како и силата на целоживотната навика, и да внимаваме да не без причина го забрзаме спроведувањето дури и на добрите идеи. Никој не смее да биде охрабруван да ја направи промената наеднаш. Местото на месото треба да биде заменето со здрава храна која нема да биде скапа. Тука многу зависи од готвачката. Со грижа и умешност можат да се направат јадења кои ќе бидат не само здрави туку и вкусни и кои, во голема мерка, ќе ја заменат месната исхрана. {СЖИ 397.4}
Во секој случај, подучувајте ја совеста, засилувајте ја волјата, погрижете се за добра, здрава храна и ќе се подготвите за промената, а потребата од месо наскоро ќе исчезне. — (1905) Здравје и среќа 316, 317 {СЖИ 398.1}
- Доброто готвење е најважно достигнување. Особено онаму каде што месото не е главна состојка на исхраната е многу важно доброто готвење. Мора да се подготви нешто што ќе го заземе местото на месото, а овие замени мораат да идат добро зготвени, за да немаме желба за месо. — Letter 60а, 1896 {СЖИ 398.2}
[Направете промени разумно – 320, 380]
[Потребна е соодветна исхрана при оставањето на месото – 320]
[Бог ќе даде мудрост во подготвување на здрава храна која ќе го замени месото – 376, 400, 401, 404]
[Исхраната составена од овошје, житарки, зрнести плодови и зеленчук треба да бидат замена за месото – 472, 483, 484, 513]
Нелогични изговори
- Кога Сатаната ќе завладее со умот, колку бргу избледуваат и остануваат без сила упатствата што Господ толку милозливо ни ги дал! Колку многу измислени причини и непостоечки неопходности, за да се одржат на погрешниот пат, да ја оттурнат светлината и да ја погазат под своите нозе! Јас зборувам со сигурност. Најголемата замерка на здравствената реформа е тоа што луѓето не живеат според неа; а сепак имаат смелост да кажат дека не би можеле да живеат според здравствената реформа и да си ја зачуваат силата. {СЖИ 398.3}
Во секој таков случај успеавме да најдеме добра причина зошто овие луѓе не би можеле да живеат според принципите на здравствената реформа. Тие никогаш не живееле според нив, ниту пак правилно ги следеле, па затоа и не можат да имаат полза од неа. Некои западнале во грешката дека, откако ќе го остават месото, не мораат да го заменат неговото место со најдоброто овошје и зеленчук, подготвен на најприроден начин, без маснотии и зачини. Кога само вешто би го аранжирале изобилството со кое Бог ги опкружил, родителите и децата со чиста совест заедно ангажирани во работата, тие би уживале во едноставна храна и тогаш би можеле разбирливо да зборуваат за здравствената реформа. Оние кои не биле преобратени за здравствената реформа и никогаш целосно не ја прифатиле, не можат да судат за нејзините придобивки. Оние кои повремено отстапуваат за да му удоволат на вкусот јадејќи мрсна мисирка или друго месо, ги изопачуваат своите апетити и не можат да ги осудуваат придобивките на системот на здравствената реформа. Нив ги контролира нивниот вкус, а не принципите. — (1870) 2. Сведоштво 486, 487 {СЖИ 399.1}
Искрени повици на реформа
- Многу родители се однесуваат како да го загубиле разумот. Тие се во состојба на летаргија, парализирани со попуштањето на изопачениот апетит и основните страсти. Нашите проповедници, кои ја знаат вистината, треба да ги издигнат луѓето од нивната одземеност и да ги наведат да ги отфрлат оние нешта кои побудуваат желба за месо. Ако тие пропуштаат да се реформираат, ќе ја загубат духовната моќ, и ќе станат сѐ повеќе унижени од грешното попуштање. Навиките кои му се одвратни на небесниот универзум, навиките кои го унижуваат човечкото суштество повеќе и од ѕверовите, се практикуваат во многу домови. Сите што ја знаат вистината треба да кажат: „Бегај од телесните желби кои војуваат на душата”. {СЖИ 399.2}
Ниту еден од нашите проповедници да не поставува лош пример јадејќи месо. Тие и нивните семејства треба да живеат според светлината на здравствената реформа. Нашите проповедници не треба да ја анимализираат сопствената природа и природата на своите деца. Децата чии желби не се под контрола, доаѓаат во искушение да им попуштаат не само на вообичаените навики на избувливост, туку и да им дадат слобода на пониските страсти и да не ги почитуваат чистотата и доблеста. Нив ги води Сатаната кој сака да ги корумпира не само нивните тела, туку и да им ги дошепнат своите лоши убедувања и на другите. Доколку родителите се заслепени од гревот, тие често нема да успеат да ги забележат овие нешта. {СЖИ 399.3}
На родителите кои живеат во градовите, Господ им испраќа предупредувачки повик: „Соберете ги вашите деца во вашите домови; оддалечете ги од оние кои не ги почитуваат Божјите заповеди, кои подучуваат и практикуваат зло. Излезете од градовите што е можно побргу”. {СЖИ 400.1}
Родителите можат да обезбедат мали домови во селата, со земја за обработување, каде можат да имаат овоштарници и да одгледуваат зеленчук и мали овошки кои ќе го заменат месото, кое толку ја загадува крвта на животот што тече низ вените. — Manuscript 133, 1902 {СЖИ 400.2}
Постот и молитвата ни даваат сила да се спротивставиме
- Доколку копнееме по месо од мртви животни, неопходно е да постиме и да се молиме на Бога да ни ја даде Својата милост да му се спротивставиме на копнежот по месо кој војува против душата. — Letter 73, 1896 {СЖИ 400.3}
[Постот е благотворен при замената на месната и богатата храна – 312]
Кога молитвата за исцелување е недоследна
- Меѓу Адвентистите на седмиот ден има такви кои нема да ја следат светлината дадена по ова прашање. Месото е дел од нивната исхрана. Се разболуваат. Болни и во маки поради својот погрешен пат, тие бараат Божјите слуги да се молат за нив. Но како може Бог да работи во нивна полза, кога тие не сакаат да ја исполнуваат Неговата волја, кога одбиваат да ги следат Неговите упатства во врска со здравствената реформа? {СЖИ 400.4}
Светлината за здравствената реформа веќе триесет години доаѓа кај Божјиот народ, но мнозина од неа направиле тема за потсмев. Тие продолжиле да употребуваат чај, кафе, зачини и месо. Нивните тела се полни со болест. Како можеме ние, прашувам јас, да Му ги претставиме ваквите луѓе на Господа за излекување? — Letter 200, 1903 {СЖИ 400.5}
- Топлите бисквити и месото се во потполна несогласност со принципите на здравствената реформа. Кога би му дозволиле на разумот да го заземе местото на импулсот и љубовта кон попуштањето на сетилата, ние не би го пробале месото од мртвите животни. што е поодвратно за сетилото за мирис од мирисот на продавници во кои се чува месо за продавање? Мирисот на живото месо е навредлив за сите чии сетила не се унижени со негување на неприродни желби. Постои ли понепријатна глетка за умот кој размислува од животно заклано за да биде изедено? Доколку не се почитува светлината што Бог ни ја дал во врска со здравствената реформа, Тој нема да направи чудо да ги одржи здрави оние кои го следат патот што ги разболува. — (1884) Extracts from Unpublished Testimonies in Regard to Flesh Foods, 2 {СЖИ 401.1}
Водачи во реформата
- Иако за нас употребата на месото не е тест, иако никого не принудуваме да се откаже од него, сепак наша должност е да бараме ниту еден наш проповедник во областите да не го сфаќа ова несериозно, или да се спротивставува на пораката да се реформира по ова прашање. Доколку, соочени со светлината што Бог ни ја открил во врска со последиците од јадењето месо по нашиот организам, вие сепак продолжите да јадете месо, ќе морате да се соочите со последиците. Но не заземајте став пред луѓето кој ќе ги наведе да мислат дека не е неопходно да повикаат на реформа во врска со јадењето месо; бидејќи Бог повикува на реформа. Господ ни ја дал задачата да ја објавуваме пораката за здравствена реформа, и доколку не можете да истапите напред во редовите на оние кои ја пренесуваат оваа порака не треба да го истакнувате тоа. Спротивставувајќи се на трудот на вашите соработници, кои подучуваат за здравствената реформа, вие сте неупотребливи и работите за погрешната страна. — Letter 48, 1902 {СЖИ 401.2}
[Делото на здравствената реформа ќе напредува; внимавајте да не му се спротивставувате – 42]
- Зарем ние, како Божји гласници не треба одлучно да го исповедаме сведоштвото против попуштањето на изопачените желби?… Бог обезбедил изобилство од овошје и зеленчук, кое може здраво да се зготви и да се јаде во соодветни количини. Зошто тогаш, луѓето продолжуваат да го одбираат месото? Можеме ли да имаме доверба во проповедниците кои седнуваат на трпезите на кои е послужено месо и јадат со другите?… {СЖИ 401.3}
„Држете ги добро заповедите на Господ вашиот Бог. Секој кој ги престапува здравствените закони, секако ќе биде посетен од Божјото незадоволство. О, колку многу Свет Дух би можеле да имаме од ден во ден, кога би живееле промислено, откажувајќи се од нашето Јас и практикувајќи ги доблестите на Христовиот карактер“. — Pacific Union Recorder, October 9, 1902 {СЖИ 402.1}
- Нашите проповедници и литерарни евангелисти треба да застанат под знамето на строгата умереност. Никогаш не срамете се да кажете: „Не, благодарам, јас не јадам месо. Совеста не ми дозволува да јадам месо од мртви животни” Доколку ви биде понуден чај, одбијте го изнесувајќи ги причините зошто го правите тоа. Објаснете дека е штетен и, иако одредено време стимулативен, дразбата набргу исчезнува, а по неа доаѓа соодветен пад на расположението. — Manuscript 113, 1901 {СЖИ 402.2}
- Во врска со месото, сите можеме да кажеме: оставете го! И сите треба да исповедаме јасно сведоштво против чајот и кафето, со тоа што никогаш нема да ги употребуваме. Тие се наркотици, штетни како за мозокот така и за другите органи во телото. Сѐ уште не е дојдено времето кога можам да кажам дека употребата на млекото и јајцата треба да биде целосно прекината. Млекото и јајцата не треба да се ставаат во ист ранг со месото. Кај некои болести, употребата на јајца е многу благотворна. {СЖИ 402.3}
Членовите на нашите цркви треба да ѝ се спротивстават на секоја себична желба. Секоја пара потрошена за чај, кафе и месо е полоша отколку загубена; бидејќи овие продукти го оневозможуваат најдобриот развој на физичките, менталните и духовните сили. — Letter 135, 1902 {СЖИ 402.4}
[Месната храна не била сервирана во домот на Вајтови ниту била користена од страна на Елена Вајт – Додаток 1:4, 5, 8, 10, 14, 15, 16, 17, 18, 21, 23]
[Месната храна била протерана од трпезата на Елена Вајт – Додаток 1:12, 13]
Содржина
- Кога би можеле да имаме полза од попуштањето на желбата за месо, јас не би ви го упатила овој повик; но знам дека не можеме. Месото е штетно за физичкото здравје и ние треба да научиме да живееме без него. Оние кои се наоѓаат во состојба каде можат да добијат вегетаријанска храна, но кои одбираат да ги следат сопствените приоритети, јадејќи и пиејќи според своите желби, постепено ќе станат незаинтересирани за Божјите упатства во врска со другите фази од денешната вистина и ќе загубат осетот за вистината, Тие сигурно ќе го жнеат она што го посеале. {СЖИ 402.5}
Покажано ми е дека учениците во нашите училишта не треба да се послужуваат со месо, или со готвени јадења за кои се знае дека не се здрави. Ништо што ќе послужи за охрабрување на желбата за надразнувачки средства не треба да се изнесе на трпезите. Ги повикувам старите, младите и средовечните: Не им попуштајте на желбите за оние работи за кои знаете дека се штетни. Служете Му на Господа со жртва. {СЖИ 403.1}
Децата треба да имаат разумен удел во ова дело. Сите ние сме членови на Божјото семејство, и Бог сака Неговите деца, и младите и старите, да бидат одлучни во непопуштањето на апетитот, штедејќи средства потребни за изградба на цркви и издржување на мисионерите. {СЖИ 403.2}
Покажано ми е да им пренесам на родителите: Поставете се себеси, со душа и дух, на Божјата страна по ова прашање. Секогаш треба да имаме на ум дека во овие денови на искушенија ние сме на суд пред Господа. Зарем нема да престанете да си попуштате и да си наштетувате? Уверливите зборови не значат ништо; вашето однесување и самооткажување треба да сведочат дека ќе им бидете послушни на барањата кои Бог ги поставува пред Својот посебен народ. Потоа, донесете го она што сте го заштедиле самооткажувајќи се, и така ќе може да продолжи Божјото дело. {СЖИ 403.3}
Мнозина мислат дека нема да можат да живеат без месна храна; но кога тие би се поставиле на Божјата страна, одлучни во намерата да чекорат под Неговото водство, ќе ги примат истата сила и мудрост како Даниел и неговите содружници. ќе откријат дека Бог ќе им даде здрав разум. Мнозина ќе се изненадат кога ќе видат колку многу може да се заштеди за Божјото дело со самооткажување. Малите заштеди направени со жртва ќе придонесат повеќе за изградување на Божјото дело отколку поголемите дарови кои не доаѓаат од самооткажувањето. {СЖИ 403.4}
Адвентистите на седмиот ден ја носат вистината за ова време. Пред повеќе од четириесет години Бог ни дал посебна светлина за здравствената реформа, но како ние ја следиме таа светлина? Колкумина одбиле да живеат во согласност со Божјите совети! Ние како народ треба да напредуваме пропорционално со светлината што сме ја примиле. Наша должност е да ги разбереме и почитуваме принципите на здравствената реформа. што се однесува до умереноста, тука треба да бидеме пред сите други луѓе; а сепак меѓу нас има добро поучени членови на црквата, па дури и проповедници на евангелието, кои малку ја вреднуваат светлината што Бог ни ја дал за оваа тема. Тие се хранат како што сакаат и работат како што сакаат… {СЖИ 404.1}
Ние не означуваме никаков одреден пат кој треба да се следи во исхраната; но велиме дека во земјите во кои има овошје, житарки и изобилство од зрнести плодови, месната храна не е вистинската храна за Божјиот народ. Покажано ми е дека месната храна има тенденција да ја анимализира природата, да им ги одземе на мажите и жените онаа љубов и сочувство кои треба да ги чувствуваат за секого и да им дозволи на пониските страсти да ги контролираат повисоките сили на организмот. Доколку јадењето месо некогаш било здраво, сега веќе не е. Карциномите, туморите и белодробните заболувања се во голема мерка предизвикани од јадењето месо. {СЖИ 404.2}
Јадењето месна храна не треба да стане предуслов за примање во црквата, но треба да го имаме предвид влијанието на, таканаречените верници кои јадат месо, врз останатите браќа и сестри. Зарем како Божји гласници не треба да му објавиме на народот: „јадете ли, пиете ли, или нешто друго правите, сето тоа правете го за слава Божја” (1. Коринтјаните 10:31). Зарем не треба да исповедаме одлучно сведоштво против попуштањето на изопачениот апетит? Зарем некој од проповедниците на евангелието, која ја објавува најсвечената вистина што некогаш им била дадена на смртниците ќе постави пример со тоа што ќе се врати кај казаните со месо во Египет? Зарем оние кои се издржуваат со десетокот од ризниците ќе си дозволат себеси самопопуштањето да ја затруе животодавната крв што тече низ нивните вени? Дали ќе ја потценат светлината и предупредувањата коишто Бог им ги дал? Кон телесното здравје треба да се однесуваме како кон клучен фактор за растење во милоста и за добивање на урамнотежено однесување. Доколку не се грижиме за желудникот како што треба, тогаш нема да можеме да изградиме правилен, морален карактер. Мозокот и нервите се поврзани со желудникот. Погрешното јадење и пиење резултира со погрешно размислување и однесување. {СЖИ 404.3}
Сега сите се испитуваат и докажуваат. Ние сме крстени во Христа и доколку го одиграме својот дел така што ќе се одделиме од сѐ што би можело да нѐ повлече надолу и да направи од нас нешто што не треба да бидеме, тогаш ќе ни биде дадена сила да растеме во Христа, Кој е нашата жива глава и ќе го видиме Божјото спасение— (1909) 9. Сведоштво 156-160 {СЖИ 405.1}
Прогресивна реформа во исхраната
[Забелешка: Историски податок е дека здравствените институции на Адвентистите на седмиот ден во своите почетоци на пациентите и персоналот им послужувале месо во поголеми или помали количини. Реформата во овој дел од здравото живеење била прогресивна. Во постарите институции, по долга борба, месото било конечно отстрането од сите трпези. Во случајот на санаториумот во Батл Крик овој чекор бил направен во 1898, главно како последица на советот од перото на сестра Вајт кој можете да го прочитате во оваа глава (722). Во санаториумот Св. Елена промената се случила во 1903. До тоа време знаењето по прашањето на безмесната исхрана било широко раширено, и месото било исфрлено од исхраната на гостите со помалку тешкотии отколку кога тоа би било направено порано. На радост на управниците на постарите институции, во новите кои се отворале некаде во тоа време, на пациентите не им била давана месна храна. Советот во врска со месото не е целосен без сликата за борбата за негово неупотребување во нашите институции која може да се согледа од неколку преписки на сестра Вајт, и упатствата во кои се повикувало на прогресивна реформа на исхраната. Многу е важно читателот да ги има предвид овие факти како и времето во кое биле напишани неколку цитати додека ја проучува оваа етапа од прашањето за месото. – [Компилаторите.] {СЖИ 405.2}
Повици за безмесна исхрана во нашите рани здравствени институции (1884)
- Утрово се разбудив во четири часот за да ви напишам неколку реда. Во последно време многу размислував за тоа како институцијата со којашто вие раководите да биде онаква каква што Бог би сакал и имам да ви предложам неколку мисли. {СЖИ 405.3}
Ние сме здравствени реформатори, кои се стремат да се вратат, колку е тоа можно, на Божјиот првичен план на умереноста. Умереноста не се состои само од воздржување од отровниот алкохол и тутунот; таа оди подалеку од тоа. Таа мора да управува со она што го јадеме. {СЖИ 406.1}
Сите вие сте запознаени со светлината за здравствената реформа. Но кога јас го посетив одморалиштето, забележав дека мошне јасно отстапување од здравствената реформа по прашањето на јадењето месо и уверена сум дека тоа мора да се смени, и тоа веднаш. Вашата исхрана е составена главно од месо. Бог не води во таа насока; непријателот се труди да го постави прашањето на храната на погрешни темели наведувајќи ги луѓето задолжени за нашите институции да ја прилагодат храната на желбите на пациентите. {СЖИ 406.2}
Кога Бог ги извел децата на Израилот од Египет, Негова намера била да ги насели во Ханан како чист, здрав и среќен народ. Да го проучуваме Божјиот план за да видиме како тоа било постигнато. Тој ја ограничил нивната исхрана. Во голема мерка им ја одземал месната храна. Но тие мрмореле по казаните со месо од Египет, па Бог им дал месо, а со него и неизбежните последици од него. {СЖИ 406.3}
Здравственото одморалиште е воспоставено со големи трошоци за лекување болести без медикаменти. Тоа би требало да се управува според хигиенските принципи. Медикаментите би требале што побргу да бидат намалени и конечно, сосема исфрлени. Треба да се едуцираат луѓето за соодветната исхрана, облекување и рекреација. Не треба да се едуцира само нашиот народ, туку и оние кои не ја примиле светлината за здравствената реформа треба да бидат поучени како да живеат здраво, во согласност со Божјите правила. Но доколку самите немаме високи стандарди по тоа прашање, зошто да правиме толку голем трошок за да отвориме здравствена институција? Каде е реформата? {СЖИ 406.4}
Не можам да се согласам дека се движиме според Божјите уредби. Нашиот ред на нештата треба да биде поинаков, или да се откажеме од името Здравствено одморалиште; зашто тоа е сосем несоодветно. Господ ми покажал дека Здравствениот институт не смее да биде формиран така што ќе ги задоволи желбите или идеите на било кого. Свесна сум дека оправданието за јадењето месо кое се дозволува во институцијата се трагачите по задоволство кои доаѓаат кај вас и не се задоволуваат со никаква друга исхрана. Тогаш, пуштете ги да одат онаму каде што ќе можат да ја добијат храната што ја сакаат. Кога институцијата не може да биде водена, дури и за гостите, според вистинските принципи, тогаш нека таа го отфрли името што го присвоила. Но изговорот кој упорно се истакнуваше не постои, бидејќи надворешните посетители се мошне малубројни. {СЖИ 406.5}
Со постојаното јадење месо, на телото неизбежно му се нанесува штета. За тоа нема друг изговор освен ниските, изопачени желби. Можеби ќе прашате, дали сосем би прекинале со јадењето месо? Мојот одговор е дека на крајот ќе дојде до тоа, но дека сѐ уште не сме подготвени за тој чекор. На јадењето месо конечно ќе му дојде крајот. Месото од животните веќе нема да претставува дел од нашата исхрана, а ние со гадење ќе гледаме кон месарниците… {СЖИ 407.1}
Ние сме изградени од она што го јадеме. Треба ли да ги засилуваме животинските страсти со тоа што ќе јадеме животинска храна? Наместо да го поучуваме сетилото за вкус да ужива во оваа гурманска храна, крајно време е да се поучиме себеси да живееме од житарки, овошје и зеленчук. Тоа е задача на сите кои се поврзани со нашите институции. Користете сѐ помалку и помалку месо, додека сосем не го исфрлите. Кога месото ќе биде исфрлено, кога сетилото за вкус нема да биде навикнато на него, кога ќе се охрабрува желбата за овошје и зеленчук, наскоро ќе биде онака како што Бог одредил дека треба да биде. Неговиот народ нема да употребува месо. {СЖИ 407.2}
Кога месото веќе нема да се употребува како до сега, ќе научите поисправен начин на готвење и ќе можете да го замените местото на месото со нешто друго. Многу здрави оброци можат да се подготват без маснотии и месо од мртви животни. Без месото можат да се подготват широк спектар едноставни оброци, кои ќе бидат совршено здрави и хранливи. Здравите луѓе мораат да јадат многу зеленчук, овошје и житарки. Повремено може да им се даде малку месо на луѓето однадвор кои така го навикнале својот вкус што мислат дека доколку немаат месо нема да можат да ја зачуваат силата. Но тие ќе имаат поголема издржливост ако се воздржуваат од месото отколку ако живеат главно од него. {СЖИ 407.3}
Основната пречка за лекарите и помошниците во Здравственото одморалиште поради која не се откажуваат од месната исхрана е таа што тие сакаат месо и тврдат дека мораат да го добијат. Затоа и самите ја охрабруваат неговата употреба. Но Бог не сака оние кои дошле во Здравственото одморалиште да бидат поучени да живеат на месна исхрана. Со разговори и пример воспитувајте ги во друга насока. Тоа ќе бара голема умешност во приготвувањето на здрава храна. ќе бара повеќе работа, но сепак, мора постепено да се направи. Употребувајте помалку месо. Оние кои готват и оние кои ја носат одговорноста треба да го навикнат сопствениот вкус на храна која е согласна со здравствените закони. {СЖИ 408.1}
Ние претпочитаме да се вратиме во Египет наместо да појдеме во Ханан. Зарем не би требало да го смениме редот на нештата? Зар не би требало да имаме чиста, здрава храна на нашите трпези? Зар не би требало да завршиме со топлите бисквити кои само придонесуваат за лошото варење? Оние кои ги подигаат стандардите колку што можат поблиску до Божјите уредби, во согласност со светлината што Бог им ја дал преку Својата реч и Сведоштвата на Неговиот Дух, нема да го сменат правецот во кој дејствуваат за да ги задоволат желбите на своите пријатели или роднини, без оглед дали се работи за еден, двајца или мнозинство такви кои живеат во спротивност со Божјите мудри совети. Доколку во овие нешта се раководиме според принципите, доколку ги одржуваме строгите правила на исхраната, доколку како христијани го навикнуваме нашиот вкус во согласност со Божјиот план, тогаш ќе го имаме влијанието што Бог сака да го имаме. Прашањето е: „Дали сакаме да бидеме вистински здравствени реформатори?” {СЖИ 408.2}
Мошне е важно да се одбегнува постојана едноличност во исхраната. Доколку храната е разновидна и апетитот ќе биде многу подобар. Бидете доследни. Не изнесувајте повеќе видови храна на трпезата во еден оброк, без разновидност во следниот. Научете да бидете штедливи во исхраната. Оставете ги луѓето да се жалат доколку го сакаат тоа. Нека наоѓаат мани доколку сметаат дека нешто не ги задоволува. Израелците постојано се жалеле на Мојсеја и на Бога. Ваша должност е да ги одржите стандардите на здравствената реформа. Со регулирањето на исхраната можете да постигнете многу повеќе за болните луѓе отколку со сите купки кои би можеле да им ги направите. {СЖИ 408.3}
Истите пари кои сега ги трошите на месо, потрошете ги за овошје. Покажете им го на луѓето правилниот начин на живеење. Ако тоа беше уште од почеток направено во институцијата ________, Господ ќе беше задоволен и ќе го одобрил тој напор… {СЖИ 408.4}
Во подготвувањето на храната треба да се вложат внимание и умешност. Се надевам дека докторката ________ ќе ја исполни улогата која ѝ е назначена, дека ќе се советува со готвачот, така што храната изнесена на трпезите во здравственото одморалиште ќе може да биде во согласност со здравствената реформа. Само затоа што некој сака да му угодува на сопствениот апетит, тој нема право да тврди дека така треба да се живее; не смее поради правецот по кој тргнал да се стреми да ја обликува институцијата така што таа ќе им соодветствува на неговиот вкус и навиките. Оние кои ја носат одговорноста за институцијата треба често взаемно да се советуваат. Тие треба да делуваат во совршена хармонија. {СЖИ 409.1}
Немојте, ве молам, да докажувате дека јадењето месо може да биде во ред, затоа што овој или оној, кој му робува на апетитот, рекол дека не може да живее во Здравственото одморалиште без месо. Одржувањето на животот со месо од мртви животни е одвратен начин на живот и, како народ, ние треба да се бориме за промена, за реформа, учејќи ги луѓето дека постојат здрави начини за приготвување на храната кои ќе им дадат повеќе сила и подобро ќе го зачуваат нивното здравје отколку месото. {СЖИ 409.2}
Гревот на ова време е неумереноста во јадењето и пиењето. Попуштањето на апетитот е Богот кој мнозина го обожуваат. Оние кои се поврзани со Здравствениот институт треба да постават добар пример во овие нешта. Тие треба да живеат разумно во страв од Бога, и да не бидат контролирани од изопачен вкус. Треба да бидат внимателно запознаени со принципите на здравствената реформа и под секакви околности да останат да стојат под нејзиното знаме. {СЖИ 409.3}
Се надевам, докторе ________, дека сѐ повеќе и повеќе ќе учите да готвите здраво. Обезбедете изобилство од добра, здрава храна. Не штедете во оваа насока. Ограничете ги вашите сметки за месо, но имајте многу добро овошје и зеленчук, и тогаш ќе уживате гледајќи го здравиот апетит со кој сите ќе се послужуваат од она што сте го приготвиле. Никогаш немојте добрата, чиста храна која се изела да ја сметате за загуба. Таа ги изградува крвта и мускулите и дава сила за секојдневните обврски. — Letter 4, 1884 {СЖИ 409.4}
[Готвењето на месна храна да не биде поучувано во нашите училишта- 817]
[Лекарите кои јадат месо да не се вработуваат во нашите санаториуми – 433]
- Многу размислував за здравствениот институт во ________. Многу мисли поминуваа низ мојот ум и сакам да ви изразам некои од нив. {СЖИ 410.1}
Си ја привикував во умот светлината што Бог ми ја дал, а преку мене и вам, за здравствената реформа. Дали внимателно и низ молитва баравте да ја разберете Божјата волја по ова прашање? Изговорот беше дека луѓето однадвор ќе сакаат месна исхрана, но дури и да им давате малку месо, јас знам дека со грижливост и умеење можат да се подготват јадења со продукти кои во голема мерка ќе го заменат месото, а овие луѓе можат за кусо време да бидат обучени да го остават месото од мртвите животни. Но доколку главниот продукт во нечија кујна е месото, тој сигурно ќе го поддржува јадењето месо а унижениот апетит ќе наоѓа секакви изговори за ваквиот начин на исхрана. {СЖИ 410.2}
Кога видов како се одвиваат работите, дека доколку _______ нема месо за готвење, таа не знае што да зготви како замена и дека месото е клучниот продукт во исхраната, почувствував дека таму мора веднаш да се направи промена. Можеби ќе имате туберкулозни пациенти кои ќе побаруваат месо, но дајте им да го јадат во нивните соби и не го искушувајте веќе изопачениот апетит на оние кои не би смееле да го јадат. .. Можеби мислите дека не би можеле да работите без месо. И јас некогаш мислев така, но знам дека во Божјиот првичен план, месото од животните не било вклучено во човечката исхрана. Гнасниот, изопачен вкус ја посакува оваа храна… Потоа податокот дека месото е главно заболено би требало да не наведе на сериозни напори за целосен прекин на неговата употреба. Мојот сегашен став е месото сосем да се исфрли. За некои ќе биде тешко да го направат тоа, исто како што за пијачот на рум е тешко да се откаже од својата чашка; но промената ќе им донесе подобрување. — Letter 2, 1884 {СЖИ 410.3}
Непосреден пристап кон проблемот
- Санаториумот работи добро. Штотуку дојдовме до спорното прашање за месото. Треба ли оние кои дошле во санаториумот да имаат месо на трпезите, па постепено да се поучуваат да го остават?… Пред многу години ми беше дадена светлина дека не треба да заземеме одлучен став за исфрлување на целото месо, затоа што во некои случаи тоа е подобро од десертите и оброците составени од слатки. Тоа сигурно ќе предизвика нарушување. Дали разновидноста и мешањето на месото, зеленчукот, овошјето, вината, чајот, кафето, слатките и тешките пити го уништува желудникот и ги става луѓето во позиција во која стануваат инвалиди со сите непожелни последици коишто болестите ги имаат врз расположението… {СЖИ 410.4}
Го претставувам зборот на Господа Бога Израелов. Поради престапот, клетвата паднала на самата земја и над стоката и над месото. Човечките суштества страдаат поради последиците од сопствената насока на делување која ги оддалечува од Божјите заповеди. И ѕверовите страдаат под оваа клетва. {СЖИ 411.1}
Јадењето месо не треба да му биде препишано на ниту еден инвалид, од ниту еден лекар кој ги разбира овие работи. Болестите кај стоката прават од јадењето месо опасна работа. Клетвата Господова е над земјата, над човекот, над ѕверовите, над рибите во морето; и како што престапувањето станува речиси универзално, на клетвата ќе ѝ биде дозволено да стане толку раширена и толку длабока колку што е и престапот. Болестите се шират преку употребата на месото. Заболеното месо на ваквиот мртов добиток се продава на пазарите, а сигурна последица од тоа се болестите меѓу луѓето. {СЖИ 411.2}
Господ ќе го доведе својот народ во состојба во која тој нема да го допре или вкуси месото од мртвите животни. Затоа, овие нешта не треба да бидат препишувани од ниту еден лекар кој го има знаењето за вистината за сегашното време. Нема безбедност во јадењето месо од мртвите животни, а за кусо време кравјото млеко исто така ќе биде исклучено од исхраната на Божјиот народ кој ги држи заповедите. За кусо време нема да биде безбедно да се употребува ништо што доаѓа од животинскиот свет. Оние кои Го држат Бога за Неговиот збор и им се покоруваат на Неговите заповеди со цело срце, ќе бидат благословени. Тој ќе биде нивниот штит и заштита. Но не можете со Бога да постапувате несериозно. Неверувањето, непослушноста, застранувањето од Божјата волја и патот ќе го доведат грешникот во положба во која Бог нема да може да му ја даде Својата Божествена милост… {СЖИ 411.3}
Повторно ќе се навратам на прашањето за исхраната. Ние сега не можеме да го правиме она што во минатото се осмелувавме да го правиме во однос на јадењето месо. Тоа отсекогаш било проклетство за човечкото семејство, но особено станало такво поради клетвата што Бог ја изрекол над стоката поради престапите и гревот на човекот. Болестите меѓу животните стануваат сѐ повообичаени и сега за нас е единствено сигурно сосем да го отфрлиме јадењето месо. Денес се најзастапени токму најтешките заболувања, па последна работа која еден осведочен лекар би требало да ја направи е да ги советува пациентите да јадат месо. Токму поради толкавата застапеност на месото во исхраната на оваа земја мажите и жените стануваат деморализирани, нивната крв е загадена, а болестите зачнати во организмот. Мнозина умираат поради јадењето месо, а не ја разбираат причината. Кога тие би ја познавале вистината, таа би им посведочила дека јадењето месо ги одвело во смрт. Веќе самата помисла да се храниме со мртво месо е одвратна, но има и нешто повеќе од тоа. Кога јадеме месо ние земаме заболено мртво ткиво кое го сее своето семе на расипаност во човечкиот организам. {СЖИ 412.1}
Ти пишувам, брате мој, дека препишувањето месо не треба веќе да се препишува во нашиот санаториум. Нема оправдание за тоа. Неговото влијание и последиците по човековиот ум се крајно опасни. Да бидеме здравствени реформатори во секоја смисла на зборот. Да ставиме во нашите институции на знаење дека веќе нема место за месна трпеза, дури ниту за оние кои доаѓаат однадвор. Тогаш едукацијата што ја даваме за нејадењето месо нема да биде само на зборови туку и на дело. Па што ако се намали бројот на гостите. Принципите ќе имаат многу поголема вредност кога ќе бидат разбрани, кога ќе биде познато дека животот на ниту едно живо суштество не треба да биде одземен за да одржи во живот еден христијанин. — Letter 59, 1898 {СЖИ 412.2}
Второ писмо за пристап кон проблемот
- Го примив вашето писмо, и ќе ви објаснам најдобро што можам во врска со месото. Зборовите што вие ги споменавте беа во писмото до _______ и некои други во времето кога сестра _______ беше во Здравственото одморалиште [720]. Јас ги пронајдов овие писма. Некои од нив беа препишани, а некои не. Им реков да го назначат датумот кога биле дадени овие изјави. Во тоа време месната храна се препишуваше и многу се употребуваше. Светлината која мене ми беше дадена беше дека месото не треба веднаш да се прекине во здрава состојба, но требаше да се разговара за употребата на било кое мртво месо; дека житарките, овошјето и зеленчукот, соодветно приготвени, се сѐ што на нашиот организам му е потребно за да се одржи здрав; но тие прво мораа да покажат дека нам не ни е потребно месото онаму каде што има овошје во изобилство, како во Калифорнија. Меѓутоа, во Здравственото одморалиште не беа подготвени да преземат одлучни чекори по толкавата употреба на месо како што беше случајот кај нив. За нив ќе беше неопходно прво да го употребуваат месото многу ретко, за конечно да прекинат со него. Мораше да има само една трпеза која ќе се викаше: „трпеза за пациентите кои јадат месо”. На другите трпези требаше да изостанува овој артикал… {СЖИ 412.3}
Јас најискрено се трудев за целосно отфрлање на месото, но на ова тешко прашање мора да му се пристапи темелно, никако избрзано онаму каде што месото се употребувало по три пати дневно. Пациентите мораат да се едуцираат од здравствена гледна точка. {СЖИ 413.1}
Тоа е сѐ на што можам да се сетам по тоа прашање. Нам ни е дадена поголема светлина која треба да ја разгледаме. Животинскиот свет е заболен, а степенот на заболеноста на човечкото семејство која е резултат на јадењето месо е тешко да се одреди. Постојано во дневните весници читаме за прегледувањето на месото. Месарниците постојано се затвораат: месото кое се продава е оценето како неподобно за употреба. {СЖИ 413.2}
Пред многу години добив светлина дека јадењето месо не е добро ниту за здравјето ниту за моралот. И ми делува многу чудно што одново и одново повторно се сретнувам со прашањето за јадење месо. Имав многу близок и одлучен разговор со лекарите во Здравствениот дом. Тие ги разгледаа браќата и сестрите и братот и сестрата ________ се најдоа во многу непријатна положба. На пациентите им се препишуваше месо… Додека бев на состанок на Австралиската Унија во Станмор, во саботата се почувствував повикана од Господовиот Дух, да проговорам за случајот на Здравствениот дом основан во Самер Хил, кој се наоѓа само неколку станици подалеку од Станмор. {СЖИ 413.3}
Ги претставив предностите кои треба да се согледаат од овој санаториум. Покажав дека месото никогаш не требало да биде изнесено на трпезите како дел од храната, дека животот и здравјето на илјадници се жртвуваат на олтарот на кој се нуди мртво месо за консумација. Никогаш не сум упатила поискрен и поодлучен повик. Реков дека сме благодарни што тука имаме институција во која месото од мртвите животни не му се препишува на ниту еден пациент. Треба да се обзнани дека ниту еден залак месо не бил изнесен на тамошните трпези, ниту за лекарите, управниците и помошниот персонал, ниту за пациентите. Реков дека имаме доверба во нашите лекари дека кон ова прашање ќе се однесуваат од здрава гледна точка; бидејќи на мртвите тела секогаш треба да се гледа како несоодветни за исхраната на христијаните. {СЖИ 414.1}
Не му дадов на овој предмет поголемо значење отколку што тој заслужува. Реков дека доколку во нашите здравствени домови се изнесува месо од мртви животни на трпезите, тие ќе се соочат со Божјото незадоволство. Тие ќе го осквернат Божјиот храм и ќе треба да им се упатат зборовите: „Кој ќе го разори Божјиот храм, него Бог ќе го разори”. Бог ми дал светлина дека Божјото проклетство е на Земјата, на морето, на добитокот, на животните. Наскоро нема да биде безбедно да се чуваат стада. Земјата пропаѓа под Божјото проклетство. — Letter 84, 1898 {СЖИ 414.2}
Остануваме верни на нашите принципи
- Во последно време бројот на пациентите во санаториумот се намали, како последица од низа околности на кои не можеше да им се помогне. Мислам дека една од причините поради недостигот на гости е ставот кој го зазедоа водачите на институцијата против служење месо на пациентите. Уште од отворањето на санаториумот, во трпезаријата било послужувано месо. Почувствувавме дека е дојдено времето да заземеме одлучен став против оваа пракса. Знаевме дека Бог е незадоволен поради тоа што на пациентите им се дава животинско месо. {СЖИ 414.3}
Сега во институцијата не се служи кафе, чај ниту месо. Ние сме одлучни да живееме според принципите на здравствената реформа, да чекориме по патот на вистината и праведноста. Не смееме, поради стравот дека ќе ги загубиме посетителите, да бидеме половични реформатори. Ние го заземавме нашиот став и, со Божја помош треба да останеме на него. Храната која им се дава на пациентите е здрава и вкусна. Менито е составено од плодови, житарки и зрнести плодови. Тука во Калифорнија има изобилство од секаков вид овошје. {СЖИ 414.4}
Доколку дојдат пациенти коишто се толку зависни од месната исхрана што мислат дека не можат да живеат без неа, ние треба да се обидеме да ги натераме да го согледаат ова прашање од разумна гледна точка. А доколку не сакаат да го сторат тоа, доколку се одлучни да го јадат она што го уништува здравјето, не треба да одбиеме да им го дадеме, доколку се согласат да го јадат во своите соби и се подготвени да се соочат со последиците. Но тие мораат да ја преземат одговорноста за своите постапки. Ние не треба да го казнуваме начинот на кој живеат. Не се осмелуваме да ја обесчестиме нашата служба казнувајќи го јадењето на она што ја загадува крвта и донесува болести. Ќе Му бидеме неверни на нашиот Господар доколку го правиме она што знаеме дека Тој не го одобрува. {СЖИ 415.1}
Тоа е нашиот став. Ние одлучивме да им бидеме верни на принципите на здравствената реформа и моја молитва е Бог да ни помогне во тоа. {СЖИ 415.2}
Мора да се направи и спроведе план којшто ќе го зголеми бројот на посетителите. Но дали за нас ќе биде исправно да се вратиме на служењето месо за да добиеме повеќе пациенти? Треба ли на болните да им го даваме она што ги разболело и поради што ќе останат болни доколку продолжат да го употребуваат како храна? Не треба ли наместо тоа да го задржиме ставот на луѓе кои се решени да ги одржат принципите на здравствената реформа? — Manuscript 3а, 1903 {СЖИ 415.3}
[Чај, кафе и месо сервирани во собите на пациентите – 437]
- Во нашите институции има такви коишто тврдат дека веруваат во принципите на здравствената реформа, а сепак ѝ попуштаат на употребата на месо и друга храна за којашто знаат дека е штетна за здравјето. Во името на Господа, јас на таквите им велам да не прифаќаат положби во нашите институции додека одбиваат да живеат согласно со принципите за кои таа институција се залага; бидејќи, на тој начин вие двојно ја отежнувате работата на учителите и водачите кои се борат да ја одржат работата на вистинскиот пат. Расчистете го кралскиот пат. Престанете да го блокирате патот на пораката што Тој ја испраќа. {СЖИ 415.4}
Покажано ми е дека принципите кои ни се дадени во раните денови на пораката нашиот народ треба да ги смета за исто толку важни како што биле тогаш. Има такви кои никогаш не ја следеле светлината што ни е дадена во врска со исхраната. Време е да ја извадиме светилката од под капакот и да ја оставиме да свети со јасни и чисти зраци. — Manuscript 73, 1908 {СЖИ 416.1}
[Да не биде сервирано во нашите санаториуми – 424, 431, 432]
[Да не биде сервирано на помошниците – 432, 444]
[Претераната употреба на слатките е исто така штетна како и употребата на месото – 533, 556, 722]
