Совети за животот и исхраната
Млеко и павлака
Дел од хранлива и вкусна диета
- Бог го опремил човекот со изобилни средства за задоволување на неизопачениот апетит. Тој ги раширил пред него производите на земјата – богата разновидност од храна којашто е пријатна за вкусот и хранлива за организмот. Нашиот добар Татко вели дека од неа смееме слободно да јадеме. Овошјето, житарките и зеленчукот, приготвени на едноставен начин, без зачини и животинска маст од кој и да е вид, заедно со млекото или павлаката ја сочинуваат најздравата исхрана. Тие го хранат телото и даваат издржливост и сила, како и живост на интелектот што стимулативната исхрана не може да го постигне. — (1890) Counsels on Health, 114, 115 {СЖИ 355.2}
- Храната треба да биде приготвена на таков начин што ќе биде не само хранлива туку и вкусна. Не треба да ѝ недостига она што му е потребно на организмот. Јас употребувам, и секогаш сум употребувала малку сол, бидејќи солта, не само што не е штетна туку е всушност суштествена за крвта. Зеленчукот треба да биде вкусно приготвен со малку млеко или павлака, или со нешто слично на нив… {СЖИ 355.3}
Воздржувајќи се од млеко, јајца и путер некои не успеале да го обезбедат организмот со соодветните хранливи материи и како последица на тоа станале слаби и неспособни за работа. На тој начин здравствената реформа се доведува на лош глас… {СЖИ 355.4}
Ќе дојде време кога можеби ќе треба да отфрлиме некои од артиклите кои денес ги употребуваме во исхраната, како што се млекото, павлаката и јајцата; но не е потребно да си нанесуваме неволји со прерани и екстремни ограничувања. Почекајте додека околностите не го наложат тоа, и додека за тоа Господ не го приготви патот. — (1909) 9. Сведоштво 162 {СЖИ 355.5}
Опасноста од нездравото млеко
- Млекото, јајцата и путерот не треба да се ставаат во иста категорија со животинските меса. Има случаи каде употребата на јајца е корисна. Не е дојдено време да кажеме дека употребата на млекото и јајцата треба да биде сосема исфрлена. Постојат сиромашни семејства чијашто исхрана се состои главно од леб и млеко. Тие имаат малку овошје, а не можат да си дозволат да купат зрнеста храна. Во проповедањето на здравствената реформа, како и во секоја друга евангелска работа, треба да се сретнеме со луѓето онаму каде што се. Сѐ додека не бидеме способни да ги поучиме како да приготват здрави, реформирани јадења кои се вкусни и евтини, ја немаме слободата да ги изнесуваме најнапредните предлози во врска со исхраната според здравствената реформа. {СЖИ 356.1}
Нека реформата во исхраната биде прогресивна. Научете ги луѓето како да приготвуваат храна без употреба на млеко или путер. Кажете им дека наскоро ќе дојде времето кога употребата на јајцата, млекото, павлаката или путерот нема да биде безбедна поради болестите кај животните коишто се зголемуваат пропорционално со зголемувањето на злото на човечкиот род. Блиску е времето кога, поради гревот на паднатиот човечки род, целиот животински свет ќе стенка под товарот на болестите коишто ќе ја снајдат нашата Земја. — (1902) 7. Сведоштво 135 {СЖИ 356.2}
[Оние на кои млекото им е особено потребно не треба целосно да го исфрлат – 625]
[Народот треба да се учи како да готви без млеко – 807]
- Ние секогаш сме употребувале малку млеко и шеќер. Никогаш не сме го негирале тоа, ниту во списите ниту во проповедите. Ние веруваме дека добитокот ќе стане толку заболен што овие продукти ќе треба да се исфрлат, но сѐ уште не е дојдено времето за целосно да ги отстраниме млекото и шеќерот од нашите трпези. — Letter 1, 1873 {СЖИ 356.3}
[За употребата на млекото и шеќерот заедно, види во отсекот ХХ „Млеко и шеќер”]
- Животните од коишто се добива млекото не се секогаш здрави. Тие можат да бидат и заболени. Кравата може да изгледа добро наутро, а да угине пред доаѓањето на ноќта. Тогаш, таа и наутро била болна, но вие не сте го знаеле тоа. Животинскиот свет е заболен. — (1870) 2. Сведоштво 369 {СЖИ 356.4}
- Светлината што ми е дадена вели дека нема да потрае уште долго пред да треба да се откажеме од секаква животинска храна. Дури и млекото ќе треба да биде отфрлено. Болестите брзо се натрупуваат. Божјото проклетство е врз Земјата затоа што човекот го има предизвикано тоа. — Union Conference Record, July 28, 1899 {СЖИ 357.1}
Стерилизација на млекото
- Ако употребувате млеко, тоа треба да биде внимателно стерилизирано; со ваквата мерка на претпазливост постои помала опасност од заболување поради неговата употреба. — (1905) Здравје и среќа 302 {СЖИ 357.2}
- Можеби ќе дојде време кога нема да биде безбедно да се употребува млеко. Но доколку кравите се здрави, а млекото внимателно сварено, нема потреба предвреме да го создаваме времето на неволјата. — Letter 39, 1901 {СЖИ 357.3}
Замена за путерот
- Јас јадам само два оброка дневно и сѐ уште ја следам светлината која ми беше дадена пред 35 години. Не употребувам месо. што се однесува до мене, јас го решив прашањето на путерот. Не го употребувам. Ова прашање треба да биде лесно решено секаде каде што не може да се добие најчист производ. Ние имаме добри крави молзници – Џерси и Холштајн. Употребуваме павлака и сите се задоволни со тоа. — Letter 45, 1903 {СЖИ 357.4}
- Јас не гледам никаква потреба од путер онаму каде што има изобилство од овошје и стерилизирана павлака. {СЖИ 357.5}
[За контекст, види 588] (ММ 269, 1904)
- Ние не изнесуваме путер на нашата трпеза. Нашиот зеленчук, воглавном, се готви со млеко или павлака и е мошне вкусен… Сметаме дека на умерената употреба на млеко од здрава крава не треба да се приговара. — Letter 5, 1870 {СЖИ 357.6}
[Употреба на млеко и павлака во домот на Вајтови – Додаток 1:4, 13, 14, 16, 22]
[Употреба на млеко и павлака во приготвувањето на храната – 517, 518, 522]
[Препорачливо како храна за состаноците под шатори – 491]
Најстрогата исхрана не е најдобра
- Ние треба да се поврземе со масите. Доколку ги подучуваме на здравствената реформа во нејзината најекстремна форма, ќе направиме штета. Ние бараме од нив да престанат да јадат месо и да пијат чај и кафе. Тоа е добро. Но некои велат дека треба да се откажеме и од млекото. Тоа е тема со која треба внимателно да се ракува. Постојат сиромашни семејства чијашто исхрана се состои од леб и млеко и, доколку можат да си дозволат, малку овошје. Сета месна храна треба да биде исфрлена, но зеленчукот треба да биде вкусно приготвен со малку млеко, павлака или нешто слично. Кога им ја презентираме здравствената реформа, сиромасите велат: „Што ќе јадеме? Ние не можеме да си дозволиме да купиме зрнеста храна!” Кога им го проповедам евангелието на сиромашните, упатена сум да им кажам да ја јадат онаа храна којашто има најмногу хранливи вредности. Не можам да им речам: „Не смеете да јадете јајца, или млеко, или павлака. Не смеете да користите путер при готвењето на храната!” Евангелието мора да им се проповеда на сиромасите, но сѐ уште не е дојдено времето да се препише најстрогата исхрана. Ќе дојде време кога можеби ќе мораме да отфрлиме некои од артиклите кои сега ги употребуваме во исхраната, како што се млекото, павлаката и јајцата, но моја порака е да не се ставате во времето на неволјите предвреме и на тој начин да се изложите на смртта. Почекајте додека Господ не го приготви патот пред вас. {СЖИ 358.1}
Ве уверувам дека вашите идеи во врска со исхраната на болните не се препорачливи. Промената е премногу голема. Иако јас би го исфрлила месото како штетно, би ја оставила употребата на помалку штетните нешта, како што се јајцата. Не го отстранувајте млекото од трпезата и не ја забранувајте неговата употреба при готвењето на храната. Млекото треба да биде добиено од здрави крави и треба да биде стерилизирано… {СЖИ 358.2}
Ќе дојде време кога млекото нема да може да се употребува толку слободно како сега; но сегашноста не е време за негово отфрлање… {СЖИ 358.3}
Но сакам да кажам дека кога ќе дојде времето кога употребата на млекото. Павлаката, путерот и јајцата веќе нема да биде безбедна, Бог ќе ни го открие тоа… {СЖИ 358.4}
Не треба да застапуваме никакви екстремности во здравствената реформа. Прашањето за употребата на млекото, путерот и јајцата ќе отвори нови проблеми. Засега не сме обременети со таа точка. Нека вашата умереност им биде позната на сите луѓе. — Letter 37, 1901 {СЖИ 359.1}
Бог ќе се погрижи
- Гледаме дека добитокот станува мошне заболен, самата земја е расипана и знаеме дека ќе дојде време кога нема да биде најдобро да употребуваме млеко и јајца. Но тоа време сѐ уште не е дојдено. Знаеме дека кога ќе дојде, Бог ќе се погрижи. Се поставува прашањето, многу значајно за сите загрижени, дали Бог ќе постави трпеза во дивината? Мислам дека одговорот може да гласи: „Да, Бог ќе обезбеди храна за Својот народ”. {СЖИ 359.2}
Во сите делови на светот ќе бидат обезбедени артикли кои ќе ги заменат млекото и јајцата. Бог ќе ни стави на знаење кога ќе дојде време да се откажеме од нив. Тој посакува сите да чувствуваат дека имаат милостив небесен Татко кој ќе ги поучува за сите нешта. Бог ќе му ги даде на својот народ насекаде низ светот, готвачка уметност и умешноста во исхранувањето, поучувајќи ги како да ги користат производите на земјата за да го одржат животот. — Letter 151, 1901 {СЖИ 359.3}
Дел 4 – Маслинки и маслиново масло
- Соодветно приготвени, маслинките, како и зрнестите плодови, го заменуваат путерот и месото. Маслото кое го внесуваме јадејќи ја маслинката е далеку подобро од животинските маснотии. Тоа служи како лаксатив. Маслинката е добра за лицата заболени од туберкулоза како и за оние со заболен и воспален желудник. — (1905) Здравје и среќа 298 {СЖИ 35.4}
- Маслинките можат да бидат приготвени за секој оброк затоа што се корисни. Придобивките стекнати со употребата на путерот можат да бидат постигнати преку јадењето на соодветно приготвени маслинки. Маслото во маслинката ја намалува опстипацијата; а за туберкулозните и оние со воспален и надразнет желудник, е подобро од секој лек. Како храна е подобро од секој вид маснотија која од втора рака би ја добиле од животните. — (1902) 7. Сведоштво 134 {СЖИ 359.5}
- Маслото во маслинката е лек за опстипација и бубрежни заболувања. — Letter 14, 1901 {СЖИ 360.1}
