Совети за животот и исхраната
Самоодрекување, несебичност и промисленост
Поуки кои му требаат на секој дом. – Научете се на самоодрекување и на тоа учете ги своите деца. На делото му е потребно сето она што можете да го заштедите преку самоодрекување. Има многу неволни на кои треба да им се помогне, необлечени кои треба да се облечат и гладни кои треба да се нахранат. Сегашната вистина треба да им се објави на оние кои сѐ уште не ја познаваат. {СД 131.1}
Кутија за самоодрекување. – Децата треба да бидат воспитани на самоодрекување. Еднаш, кога проповедав во Нешвил, Бог ми даде светлина во поглед на ова нешто. Таа засветли врз мене со голема сила за тоа дека секој дом треба да има кутија за самоодрекување и дека во таа кутија децата треба да бидат учени да ставаат парички, кои инаку би ги потрошиле за бонбони или други ненужни нешта… {СД 132.1}
Ќе откриете дека кога децата ќе ги ставаат паричките во тие кутии, ќе се здобијат со голем благослов… Секој член на семејството, од најстариот до најмладиот, треба да практикува самоодрекување. {СД 132.2}
Децата не треба да бидат центар на вниманието. – Децата кои имаат две или четири години не треба да бидат поттикнувани да мислат дека мора да им се даде сѐ што ќе побараат. Родителите треба да им дадат поуки на самоодрекување и никогаш да не ги третираат на начин кој ќе ги стави во центар и да мислат дека сите нешта се вртат околу нив. {СД 132.3}
Многу деца наследиле себичност од своите родители, но родителите треба да настојуваат да го искоренат секое влакно на оваа зла наклонетост од нивната природа. Христос дал многу укори до оние кои биле лакоми и себични. Родителите треба да настојуваат, на првата појава на себични црти на карактерот, без оглед дали во нивна присутност или кога се во друштво на други деца, да ги зауздаат и искоренат тие црти од карактерот на нивните деца. {СД 132.4}
Некои родители посветуваат многу време забавувајќи ги своите деца, но децата треба да научат самите да се забавуваат, да развиваат сопствена остроумност и умешност. На тој начин ќе научат да се задоволуваат со мали задоволства. Треба да научат храбро да ги носат своите мали разочарувања и борби. Наместо да бараат внимание при секоја безначајна болка или повреда, одвратете ги нивните мисли; научете ги да преминуваат лесно преку малите незгоди или неудобности. {СД 132.5}
Доблеста на несебичност. – Една од доблестите која треба посебно да се негува и развива кај секое дете е несебичноста, која на животот му дава толку природна милност. Од сите одлики на карактерот оваа е една од најубавите, и за секое вистинско животно дело тоа е една од најважните квалификации. {СД 133.1}
Размислувајте за тоа како своите деца да ги научите да бидат склони да размислуваат за другите. Младите од најраното детство треба да се навикнуваат на потчинетост, самоодрекување и обѕир кон среќата на другите. Треба да ги научите да го потчинат избувливиот темперамент, да се воздржат од страствено зборување и, секогаш да манифестираат непроменлива љубезност, учтивост и самоконтрола. {СД 133.2}
Колку внимателно родителите треба да управуваат со своите деца со цел да дејствуваат против секоја наклонетост кон себичност! Тие постојано треба да сугерираат начини преку кои нивните деца можат да мислат на другите и да научат да чинат нешта за своите татковци и мајки, кои чинат сѐ што можат за нив. {СД 133.3}
