8 моќни исцелители
2. Сончева светлина
„Мила е светлината и пријатно е да се види со очите сонцето.“ (Проповедник 11:7)
„Сонцето е од Бога даден лекар.“ (Објавени ракописи 20, 25)
Болните сами често бегаат од сонце. Тоа е еден од најмоќните лекови на природата. Многу е едноставно да се ужива во зраците на Божјото сонце и да се пушти да го краси нашиот дом. Токму затоа тој лек не е во мода. И луѓето гледаат сонцето никако да не дојде до нивните трпезарии и спални соби, навлекуваат завеси и спуштаат ролетни, како овие зраци да го уништуваат животот и здравјето. Не се од Бога многуте неволји од кои страдаат смртните луѓе. Од сопствена лудост ние се лишивме од благодатите кои Бог ни ги подарил и кои, кога правилно би се користеле, би биле од непроценлива вредност за обновување на здравјето. Ако сакате вашите домови да бидат здрави и навистина привлечни, осветлете ги со воздух и сонце. Тргнете ги своите тешки завеси, отворете ги прозорците и ролетните и радувајте се на изобилството на сонце, дури и ако тоа им пречи на вашите килими. Можеби драгоценото сонце ќе направи вашите килими да избледат, но затоа ќе даде здрава боја на вашите деца. Ако чувствувате Божјо присуство и љубов во срцето, еден скромен дом, исполнет со воздух и сонце, во кој владее несебично гостопримство, земјата ќе биде небо и за вашето семејство и за уморниот патник. (2. Сведоштво, 527)
Кога Бог го создавал нашиот свет и темнината се простираше над бездната, Бог рече: „Нека биде светлина!” И настана светлина. И Бог виде дека светлината е добра. Ќе сакаме ли тогаш да ги затвориме своите домови и да ја изгониме светлината која Бог ја прогласил за добра? (Мојот живот денес, 138)
Бледата и слаба билка, која во рана пролет едвај ја пробива студената земјина кора, за само неколку дена под влијание на животодавните сончеви зраци добива природна, здрава, темнозелена боја. Излегувајте често на светлината и топлината на величественото сонце и заедно со растењето на вегетацијата на растителниот свет уживајте во неговите животодавни зраци. (Мојот живот денес, 152)
Малкумина се оние кои сфаќаат дека треба да уживаат во богатството на сончевата светлина, чистиот воздух и телесните вежби, кои сакаат да уживаат во здравјето и да бидат среќни. Ги жалиме малите деца кои се зад затворените врати додека сјајното сонце осветлува сѐ. (Мојот живот денес, 138)
Многу пациенти долги недели па дури и месеци се затворени во ѕидовите на своите соби. Притоа тие целосно се лишени од сончевата светлина и свежиот воздух, како тие да се нивни смртни непријатели, а не лекарства, кои очајно им се потребни за да им биде подобро… Но овие корисни лекарства, кои ни се дадени од самото небо, се фрлени настрана не само како безвредни, туку како опасни непријатели. (Совети за здравјето, 55)
Своите момчиња и девојчиња облечете ги удобно и соодветно на годишното време. Тогаш пуштете ги надвор да вежбаат на свеж воздух, да уживаат во здравјето и среќата.
Ниедна просторија во куќата не смее да биде без веселата, оживувачка светлина и сончевиот сјај, тој бесплатен небесен подарок за човекот…
Дали сакате вашите домови да бидат удобни и гостољубиви, освежете ги со воздухот и сончевата светлина. Можеби драгоцената сончева светлина ќе направи вашите теписи да избледат, но затоа ќе им даде здрава боја на образите на вашите деца. Ако чувствувате Божјо присуство и љубов во срцето, еден скромен дом, исполнет со воздух и сончева светлина… за вашето семејство тоа ќе биде… небо на земјата.
Вежбајте и користете ги бесплатните дарови на воздухот и сончевата светлина – благослови кои Небото бесплатно ги излева на сите – и ќе примите живот и сила. (Мојот живот денес, 138)
На гостинските соби треба да им се посвети подеднакво внимание како на собите наменети за постојана употреба. Како во другите спални соби и во неа треба да има доволно воздух, сонце и уред за загревање, кој ќе ја исуши влагата што секогаш се јавува во простории што не се употребуваат постојано. Секој што спие во темна просторија, или во недоволно проветрена и сува постела, го ризикува сопственото здравје, а често и својот живот.
Многу луѓе внимателно се грижат за цвеќињата или растенијата во своите домови. Стакленикот или прозорецот наменет за таа употреба е топол и сончев; бидејќи без топлина, воздух и сонце растенијата нема да живеат и да напредуваат. Ако е ова потребно за животот на растенијата, колку е тогаш понеопходно за нашето и здравјето на нашите семејства и гости!
Ако сакаме нашиот дом да биде здраво и среќно место, ние мораме да го поставиме над влагата и маглата на ниските предели и да овозможиме слободен пристап на животворните небесни дарови. Растргнете ги тешките завеси, отворете ги ролетните и прозорците, не дозволувајте да ги засенчува никаков бршлен, без оглед на неговата убавина; не садете дрвја толку блиску до куќата што ќе му оневозможат пристап на сонцето. Завесите и мебелот можеби ќе избледат од сонцето и рамките на сликите ќе потемнат; но тоа ќе донесе здрав сјај на детските образи.
Оние што се грижат за постарите лица, треба особено да внимаваат тие да имаат добро затоплени, удобни соби. Виталноста исчезнува со одминувањето на годините, а со тоа се намалува и способноста за борба со нездравите влијанија; затоа старите имаат поголема потреба од сонце и свеж, чист воздух. (Здравје и среќа, 275)
